Խոսրով Հարությունյանի կարծիքով` նոր կառավարության ծրագրի իրականացումը նպաստելու է արտագաղթի կասեցմանը
Հովիկ Աբրահամյանի գլխավորած կառավարության ներկայացրած ծրագիրը շահեկանորեն տարբերվում է նախորդից, և ոչ միայն իրատեսական է, այլև խիստ հրատապ և արդիական: 168.am-ի հետ զրույցում այսպիսի տեսակետ հայտնեց ՀՀ նախկին վարչապետ, Քրիստոնեա-ժողովրդավարական կուսակցության ղեկավար, ԱԺ «Հանրապետական» խմբակցության անդամ Խոսրով Հարությունյանը:
«Ներկայացված ծրագիրը շահեկանորեն տարբերվում է մի քանի գործոններով: Առաջինը, շատ հստակ արձանագրված է առաջիկա երեք տարիների համար կառավարության հիմնական քաղաքական նպատակը` քաղաքացին: Դա շատ կարևոր հանգամանք է: Ըստ էության, այս ծրագրով կառավարությունը փորձում է իրականացնել այն հայտնի քաղաքական թեզը, որ ոչ թե քաղաքացին է պետության համար, այլ պետությունն է քաղաքացու համար:
Ընդ որում, դա լոկ քաղաքական լոզունգ չէ, դա ցույց է տալիս հետագա քաղաքական նպատակների հիերարխիան, որոնք արձանագրված են ծրագրում, մասնավորապես` ստեղծել նպաստավոր պայմաններ արտագաղթի կրճատման և աղքատության նվազման համար, այդ նպատակին հասնել` մի կողմից, փոքր և միջին ձեռնարկատիրությունների համար ազատությունների սահմանները բարձրացնելով, մյուս կողմից` ակնհայտորեն ներդրումներ ներգրավելու կամ սեփական խնայողությունները ներդրումների վերածելու ճանապարհով աշխատատեղեր ստեղծելու գործընթացը խթանելու միջոցով:
Այսինքն` ծրագրային այս երկու հիմնասյուներն այն հիմնական քաղաքական թեզերն են, որոնց իրականացումը նպաստելու է արտագաղթի նվազեցմանը: Ակնհայտ ճշմարտություն է, որ մեր հայրենակիցները, ովքեր լքում են Հայաստանը աշխատանքային և ոչ աշխատանքային միգրանտների տեսքով, մեկնում են հիմնականում Ռուսաստան` մի երկիր, որտեղ բարոյահոգեբանական մթնոլորտը, արդարության պակասը, հանցավորության վիճակն առանձնապես բարենպաստ չէ, հետևաբար` արտագաղթը ծնող պատճառը հիմնականում տնտեսական է:
Եթե մեզ հաջողվի ստեղծել բարենպաստ միջավայր, որը հնարավորություն կտա սեփական երկրում բիզնեսով զբաղվելու միջոցով ապահովել Ռուսաստանից սպասվելիք եկամուտների անգամ մի մասը, ապա շատերը կգերադասեն մնալ Հայաստանում, քան թե մեկնել Ռուսաստան: Սրանով են պայմանավորված փոքր և միջին ձեռնարկատիրության համար կառավարության ծրագրում առաջ քաշված հիմնական թեզերը:
Երկրորդը, շատ էական եմ համարում նաև այն, որ կառավարությունը շատ հստակ արձանագրում է արտահանմանը միտված տնտեսական կարողությունների զարգացումը նոր ներդրումների ճանապարհով: Ընդ որում, շատ հստակ արձանագրված է, որ այդ ներդրումները պետք է փորձեն իրականացնել օտարերկրյա, նույնիսկ հայտնի բրենդային ֆիրմաները Հայաստան ներգրավելու ճանապարհով: Ինչո՞ւ, որովհետև եթե նույնիսկ հզորացնենք սեփական արտադրական կարողությունները, շոշափելի ժամանակահատվածում արտաքին շուկաներում մրցունակ կարողություններ ստեղծելը մեզ համար շատ դժվար է լինելու:
Եվ կառավարությունը կարևորում է հիմնականում օտարերկրյա ներդրումների միջոցով բարձր աշխատավարձով աշխատատեղեր ստեղծելը: Իսկ դրան զուգահեռ զարկ տալով տեղական արտադրական կապիտալի ձևավորմանը` այդ օտարերկրյա կապիտալը մեզ համար դառնում է լոկոմոտիվ` օտարերկրյա շուկաներ թափանցելու համար: Համաձայնեք, որ արտագաղթի կասեցման հիմնական կռվանները սրանք են: Սրանք լուրջ հարցեր են, և այս տեսակետից ես կառավարության գործունեության ծրագիրը համարում եմ ոչ միայն իրատեսական, այլև խիստ հրատապ և արդիական»,- կարծիք հայտնեց Խոսրով Հարությունյանը:
Մենք նկատեցինք, որ, օրինակ, փոքր ու միջին բիզնեսի զարգացմանը նպաստելու, օտարերկրյա ներդրումները խթանելու և արտագաղթը կասեցնելու նպատակներն իր առջև դրել էր նաև նախորդ կառավարությունը, սակայն իրական պատկերը բոլորովին այլ է: Ի պատասխան` Խ. Հարությունյանն ասաց.
«Ճիշտ եք ասում, ուղղակի կա մի տարբերություն, որ բոլոր տեղերում էլ խոսել են արտագաղթի մասին, բոլոր ծրագրերում էլ գրվել է փոքր ու միջին ձեռնարկատիրությանը նպաստելու մասին, բայց արտագաղթը կասեցնելու համակարգված շարադրանք առաջին ես անգամ եմ հանդիպում: Ինձ մոտ դա է վստահություն ներշնչում: Մարդը ոչ թե պարզապես խոսում է արտագաղթի մասին, այլ, ըստ էության, արձանագրում է` թեպետ արտագաղթ ծնող պատճառը տնտեսական է, բայց արտագաղթի հետևանքները տնտեսական չեն, դրանք և´ բարոյահոգեբանական են, և´ սոցիալական, և´ քաղաքական, և, եթե կուզեք, նույնիսկ ազգային անվտանգության համատեքստում են: Հետևաբար, նա կարևորում է խնդիրը և քայլ առ քայլ լուծում է առաջարկում: Սա է առաջացնում վստահություն»:
