Կովկասում ինքնորոշման մասին խոսակցությունները տագնապահարույց են. Լամբերտո Զանիեր
Ադրբեջանական Turan լրատվական գործակալությանը տված հարցազրույցի ժամանակ ԵԱՀԿ-ի գլխավոր քարտուղար Լամբերտո Զանիերը հույս է հայտնել, որ նոր ջանքերը կօգնեն Ղարաբաղյան բանակցային գործընթացում առաջընթաց գրանցելուն:
Զանիերի խոսքերով՝ միջազգային հանրության ողջ ուշադրությունը բևեռված է Ուկրաինայի դեմ ռուսական ագրեսիայի վրա և նրան, որ անկայունացումը չտարածվի Կովկասի տարածաշրջանի վրա ու չդառնա նոր էսկալացման պատճառ.
«Թեև ընդհանուր առմամբ Կովկասում իրավիճակը հանգիստ է, սակայն ինքնորոշման մասին խոսակցությունները տագնապահարույց են: Իրավիճակը կարող է հետ վերադառնալ և խնդիրներ ստեղծել ապագայում:
Միջնորդներն աշխատելու են Հայաստանի ու Ադրբեջանի նախագահների նոր հանդիպումների կազմակերպման ուղղությամբ: Թվում է, թե ներկայումս կա հնարավորություն՝ Հարավային Կովկասում կարգավորման շուրջ իրական բանակցություններ սկսելու համար»:
Հիշեցնենք, որ Զանիերը վերընտրվել է ԵԱՀԿ-ի գլխավոր քարտուղարի պաշտոնում:
