ԱՄՆ-ի ու Իրանի պատվիրակությունները երկկողմ հանդիպում են անցկացնում Վիեննայում. աղբյուր
Ռուսական ИТАР-ТАСС լրատվական գործակալության փոխանցմամբ՝ ԱՄՆ-ի ու Իրանի պատվիրակությունները երկկողմ հանդիպում են անցկացնում Վիեննայում Իրանի ու «Վեցյակի» միջև ընթացող բանակցությունների չորրորդ փուլի շրջանակներում: Այս մասին հայտնել է իրանական պատվիրակությունում գործակալության աղբյուրը:
Վերջինիս խոսքերով՝ Իրանի ու ԱՄՆ-ի պատվիրակությունները հանդիպում են, որպեսզի մանրամասնորեն քննարկեն ապագա համապարփակ համաձայնագրի ասպեկտները: Նա ընդգծել է, որ դեռ կան խնդրահարույց հարցեր, սակայն իրենք պատրաստ են հասնել դրանց լուծմանը:
Աղբյուրը հավելել է, որ այսօր վաղ առավոտյան իրանական պատվիրակության հետ հանդիպել են ԵՄ-ի ներկայացուցիչները: Այսօր պլանավորված են ևս մի շարք հանդիպումներ, այդ թվում նաև Իրանի արտգործնախարար Մոհամմադ Ջավադ Զարիֆի ու ԵՄ-ի դիվանագիտության ղեկավար Քեթրին Էշթոնի համատեղ մամուլի ասուլիսը:
