Ուկրաինան երբեք չի լինի ԵՄ-ում, այնտեղ նրան ոչ ոք չի սպասում. Լուկաշենկո
Բելառուսական BELTA լրատվական գործակալության փոխանցմամբ՝ Բելառուսի նախագահ Ալեքսանդր Լուկաշենկոն Ռուսաստանի Անվտանգության խորհրդի քարտուղար Նիկոլայ Պատրուշևի հետ հանդիպման ժամանակ բացառել է Ուկրաինայի եվրաինտեգրումը:
Լուկաշենկոն հայտարարել է, որ Ուկրաինայի ժողովրդի եվրաինտեգրացիոն ձգտումները միայն պատահականություն են և կրում են ժամանակավոր բնույթ: Լուկաշենկոյի խոսքերով՝ Ուկրաինան երբեք չի լինի ԵՄ-ում, այնտեղ նրան ոչ ոք չի սպասում:
Լուկաշենկոն Արևմուտքին խորհուրդ է տվել Ուկրաինան չօգտագործել որպես Ռուսաստանի վրա ճնշում գործադրելու լծակ: Նա խոստովանել է, որ Ռուսաստանն ու Բելառուսը վախենում են ՆԱՏՕ-ին Ուկրաինայի անդամակցելուց.
«Գլխավորն այն է, որ Ուկրաինան մնա Ուկրաինա, չվերածվի մեր սահմանների մոտ ՆԱՏՕ-ի բազայի: Մենք դա չենք թաքցնում: Դա կարևոր է թե՛ Ռուսաստանի, թե՛ Բելառուսի համար»:
Բելառուսի նախագահը հույս է հայտնել, որ Ուկրաինայում իրավիճակը ժամանակի հետ կկայունանա՝ նշելով, որ Ուկրաինայի տնտեսական իրավիճակի վատթարացումը բացասաբար է ազդում ողջ հետխորհրդային տիրույթի վրա:
