Ուկրաինական ճգնաժամի ֆոնին մեծացել է Գերմանիայի հանդեպ ՌԴ հատուկ ծառայությունների հետաքրքրությունը
Deutsche Welle-ի փոխանցմամբ՝ Ուկրաինայի ճգնաժամի ֆոնին գերմանական բունդեսթագի՝ հատուկ ծառայությունների գործունեությունը վերահսկող հանձնաժողովը հետաքննում է Գերմանիայի տարածքում Ռուսաստանի լրտեսական գործունեությունը:
Հանձնաժողովի արտահերթ նիստում գերմանացի պատգամավորներն իրազեկվել են երկրի տարածքում ռուս գործակալների գործունեության մասշտաբների մասին: Նիստի գումարման համար առիթ են հանդիսացել Գերմանիայում և հատկապես Բեռլինում Ռուսաստանի արտաքին հետախուզության գործունեության մասին ԶԼՄ-ների հրապարակումները:
Ընդգծվել է, որ ուկրաինական ճգնաժամն ուժեղացրել է Գերմանիայի հանդեպ ռուսական հատուկ ծառայությունների հետաքրքրությունը: Ռուս գործակալները ցանկանում են իրազեկվել Գերմանիայում քաղաքական որոշումների ընդունման մեխանիզմների մասին, ինչպես նաև պարզել, թե Գերմանիան ու Եվրոպան որչափ են պատրաստ տնտեսական աջակցություն ցուցաբերել Ուկրաինային, ինչը մասնավորապես վերաբերում է գազ մատակարարելուն:
