Մենք աջակցում ենք Վրաստանի, Ուկրաինայի ու Ադրբեջանի տարածքային ամբողջականությանը. Գյուլ
Ադրբեջանական Trend լրատվական գործակալության փոխանցմամբ՝ Թբիլիսիսում ավարտվել է Թուրքիայի, Վրաստանի ու Ադրբեջանի նախագահների մասնակցությամբ գագաթաժողովը: Գագաթաժողովի արդյունքներով կազմակերպված մամուլի ասուլիսի ժամանակ Գյուլն անդրադարձել է Հարավային Կովկասի հակամարտությունների խնդրին.
«Հարավային Կովկասի հակամարտությունները պետք է կարգավորել երկրների տարածքային ամբողջականության շրջանակներում: Մենք ևս մեկ անգամ հաստատեցինք, որ աջակցում ենք Վրաստանի ու Ադրբեջանի տարածքային ամբողջականությանը և ընդգծեցինք տարածաշրջանային հակամարտությունները խաղաղության ու տարածքային ամբողջականության շրջանակներում կարգավորելու կարևորությունը»:
Գյուլը հաստատել է, որ հանդիպման ժամանակ իրենք քննարկել են Ուկրաինայի հարցը. «Մենք միասնական կարծիքի ենք, որ ուկրաինական քաղաքական ճգնաժամը կազդի մեր տարածաշրջանի խաղաղության ու կայունության վրա, և կողմնակից ենք, որ այն կարգավորվի տարածքային ամբողջականության ու միջազգային իրավունքի շրջանակներում: Թուրքիան ակնդետ հետևում է Ղրիմի թաթարների դրությանը»:
