ԱՄՆ-ը երկարաձգել է Ջիբութիի ռազմաբազայի վարձակալման համաձայնագրի ժամկետը
Ամերիկյան The Washington Post թերթի փոխանցմամբ՝ ԱՄՆ-ի իշխանություններն իրենց զորքերի համար երկարաձգել են Ջիբութիի ռազմավարական կարևոր բազայի վարձակալության երկարաժամկետ համաձայնագիրը: Այս մասին երեկ հայտարարել է ԱՄՆ նախագահ Բարաք Օբաման, ով դրանից առաջ Սպիտակ տանը հանդիպել է Ջիբութիի նախագահ Օմար Գելլեհի հետ:
Օբաման հայտարարել է, որ Քեմթ Լեմոնիեի բազան չափազանց կարևոր է Աֆրիկյան եղջյուրի շրջանում և ընդհանրապես ողջ տարածաշրջանում իրենց գործողությունների համար: Գելեհն իր հերթին հայտարարել է, որ ձեռք բերված համաձայնագիրը կնպաստի մոլորակի այդ հատվածում ահաբեկչության և մարդավաճառության դեմ պայքարում ռազմավարական համագործակցության զարգացմանը:
Քեմփ Լեմոնիեի բազան ժամանակին ստեղծվել է ֆրանսիական Օտար լեգիոնի կողմից: Պենտագոնն իր զորքերն այնտեղ տեղակայել է 2002 թվականին՝ Աֆրիկյան եղջյուրի տարածաշրջանի ահաբեկիչների դեմ պայքարի համար: Այնտեղ տեղակայված է մոտ 4000 զինծառայող, որոնց տրամադրության տակ կան անօդաչու թռչող սարքեր:
