Սիրիայից քիմիական զենքի դուրս բերումը կասեցված է մարտի 20-ից. ՄԱԿ
Ռուսական РИА Новости լրատվական գործակալության փոխանցմամբ՝ Սիրիայի Լաթաքիա քաղաքից քիմիական սպառազինության դուրս բերման գործողությունը կասեցված է մարտի 20-ից, ինչի պատճառն իշխանությունների ու ընդդիմության միջև մարտերն են:
Այս մասին երեկ տեղի ունեցած ճեպազրույցի ժամանակ հայտարարել է ՄԱԿ-ի պաշտոնական ներկայացուցչի տեղակալ Ֆարհան Հակը: Նա ընդգծել է, որ մարտի 20-ից հետո չի գրանցվել որևէ առաջընթաց, քանի որ քիմիական զենքի դուրս բերման գործընթացը ժամանակավորապես կասեցվել է անվտանգության նկատառումներից ելնելով:
Հակի խոսքերով գործընթացը կվերսկսվի համապատասխան հնարավորության ի հայտ գալու դեպքում: Սիրիայի իշխանությունները պատրաստել են 72 բեռնարկղ, որոնք լեցուն են քիմիական զենքով ու դրա բաղադրատարրերով: Այդ բեռնարկղերը պետք է դուրս բերվեն երկրի տարածքից, իսկ դրանց պարունակությունը ենթակա է հետագա ոչնչացման:
