Էրդողանի կուսակցությունը խորհրդարանին ներկայացրել է հետախուզության «ձեռքերն արձակող» օրինագիծ

Թուրքական Cihan լրատվական գործակալության փոխանցմամբ` խորհրդարանական արձակուրդներից ընդամենը մի քանի օր առաջ Թուրքիայի կառավարությունն առաջարկել է հերթական ապշեցուցիչ օրինագիծը, որն էականորեն կընդլայնի Ազգային հետախուզական կազմակերպության (MIT) լիազորությունները:

Օրինագիծը նախատեսում է լուրջ փոփոխություններ անել պետանվտանգության ծառայության կառուցվածքում: Օրինագծի հեղինակներն իշխող «Արդարություն ու զարգացում» կուսակցության (ԱԶԿ) պատգամավորներ Ալփարսլան Քավաքօղլուն և Իդրիս Շահինն են:

Ակնկալվում է, որ օրինագիծը կքննարկվի մեկ շաբաթ անց: Դրա համաձայն, MIT-ը կստանա հավելյալ իրավունքներ, բացի այդ, կբարդացվի MIT-ի աշխատակիցներին քրեական պատասխանատվության ենթարկելը:

Օրինագծի ընդունվելու դեպքում MIT-ի ներկայացուցիչներին անհնար կլինի նույն գործով երկու անգամ դատելը` անգամ հավելյալ հանցանշանների կամ վկաների առկայության դեպքում: MIT-ի անձնակազմի գործերի դիտարկման իրավունք կունենա միայն ծանր հանցագործությունները քննող հատուկ դատարանը, որը հատուկ այդ նպատակով ստեղծվելու է Անկարայում:

Ինչ վերաբերում է MIT-ի ղեկավարին, ապա նրան դատելու իրավունք կստանա միայն Թուրքիայի Վճռաբեկ դատարանը: Թուրք իրավապաշտպաններին անհանգստացրել է այս օրինագիծը: Նրանք կարծում են, որ օրինագիծը հակասում է Թուրքիայի Սահմանադրության 2-րդ հոդվածին, որում գրված է, որ Թուրքիան իրավական պետություն է:

Նրանք օրինագիծը համեմատում են 1982 թվականի Սահմանադրության 15-րդ հոդվածի հետ, որը հեղաշրջման կազմակերպիչներին ազատում է կատարած հանցանքների համար հետապնդումներից (2010 թվականի սեպտեմբերի 12-ին` 1980 թվականի հեղաշրջումից ուղիղ 30 տարի անց, Թուրքիայում անցկացված սահմանադրական բարեփոխումների շուրջ հանրաքվեով վերացվեց այդ հոդվածը – 168.am)