Բրյուսելում մեկնարկում է «ԵՄ-Ռուսաստան» 32-րդ գագաթաժողովը
Ռուսական РИА Новости լրատվական գործակալության փոխանցմամբ՝ այսօր Բրյուսելում մեկնարկում է «Ռուսաստան-ԵՄ» 32-րդ գագաթաժողովը: Այս մասին հայտնել է Կրեմլի մամլո ծառայությունը: Վերջինիս հաղորդմամբ՝ մեկօրյա գագաթաժողովի ժամանակ կողմերը պլանավորել են կենտրոնանալ համագործակցության կարևորագույն ռազմավարական ուղղությունների վրա:
Չի բացառվում, որ ԵՄ-ի առաջարկով կարող է քննարկվել Ուկրաինայում ստեղծված իրավիճակը: Ավելի վաղ ռուսական կողմը հայտարարել էր, որ գագաթաժողովում չի քննարկվելու Ուկրաինայի հարցը:
Ռուսական կողմից գագաթաժողովին մասնակցում են Ռուսաստանի նախագահ Վլադիիմիր Պուտինն ու արտգործնախարար Սերգեյ Լավրովը, իսկ ԵՄ-ի կողմից՝ Եվրոպական խորհրդի նախագահ Հերման վան Ռոմպեյը, Եվրահանձնաժողովի նախագահ Ժոզե Մանուել Բառոզուն և ԵՄ-ի դիվանագիտության ղեկավար Քեթրին Էշթոնը:
Եվրոպական կողմի նախաձեռնությամբ հանդիպումն անցկացվելու է կրճատ ձևաչափով. երկու օրվա փոխարեն այն կանցկացվի մեկ օրում: Դրանում պլանավորված չէ փաստաթղթերի ստորագրում:
