Գագիկ Բեգլարյանի հատուկ ծրագիրը՝ էլեկտրոնային առևտուրը զարգացնելու համար

Գագիկ Բեգլարյանը որոշել է զարկ տալ էլեկտրոնային առևտրի զարգացմանը, ցանցային պատրաստվածությանն ու տեխնիկական հագեցվածությանը, որի համար տրանսպորտի և կապի նախարարությունը հատուկ ծրագիր է մշակել: Այն ներառված է կառավարության առաջիկա նիստի օրակարգում և սպասում է գործադիրի հաստատմանը:

 Ըստ ծրագրի՝ XX դարի վերջին տասնամյակը դարձավ համաշխարհային տնտեսության մեջ արմատական փոփոխությունների շրջան` փոխելով տնտեսական արժեքների մասին ավանդական պատկերացումները: Այս փոփոխությունների համար խթան է հանդիսանում տեղեկատվական տեխնոլոգիաների արագ զարգացումը, որը սերտ կապված է համաշխարհային տնտեսության հետ: Առևտրային գործարքների իրականացման գոյություն ունեցող տեխնոլոգիաները արմատապես փոխվել են: Ստեղծվել է բիզնեսի համար նոր էլեկտրոնային միջավայր «Էլեկտրոնային առևտուր»:

 «Էլեկտրոնային առևտրի զարգացումը ինքնանպատակ չէ և օժանդակելու է Հայաստանում տեղեկատվական ենթակառուցվածքի շուկայում ժամանակակից պահանջների համապատասխանության խնդրի լուծմանը: Էլեկտրոնային առևտրի առավելությունը կայանում է նրանում, որ այն թույլ է տալիս մատակարարման ծախսերը կրճատել 20-30%-ով»,- նշված է որոշման նախագծի հիմնավորման մեջ:

 Այն երկրներում, որտեղ էլեկտրոնային առևտուրը առավել զարգացած է (ԱՄՆ, Ճապոնիա և ԵՄ երկրներ), այդպիսի մոտեցումը մարմնավորվում է ձեռնարկությունների ռեսուրսների կառավարման համակարգի ստեղծման մեջ (Enterprise Resource Planning), որը դարձել է էլեկտրոնային առևտրի հիմնական ենթակառուցվածքը: Համաշխարհային տնտեսության մեջ բարեհաջող ինտեգրացիայի համար Հայաստանը պարտավոր է հաշվի առնել առևտրի զարգացման ընդհանուր տենդենցները, այդ թվում`  էլեկտրոնային առևտրի ոլորտում:

 ՀՀ բանկերի կողմից թողարկված Վիզա և Մաստեր քարտ միջազգային վճարային քարտերի քարտապանները կարող են իրականացնել առևտուր համացանցում, այդ թվում նաև իրականցել վաճառք։ ՀՀ ԿԲ-ն սկսել է բանակցությունները PayPal ընկերության հետ՝ Հայաստանում ընկերության կողմից մատուցվող ծառայությունների ընդլայնման վերաբերյալ, այսինքն՝ PayPal ընկերության միջոցով իրականացնել ոչ միայն գնումներ, այլ նաև հնարավորություն ունենալ իրականացնել վաճառք։