Ի՞նչ է դպրոցական սթրեսը և ինչպե՞ս հաղթահարել այն
Դպրոցական սթրեսը հատկապես ավելի շատ հանդիպում է առաջին դասարանցիների մոտ, որոնց գլխին առաջին իսկ օրը մեծ քանակությամբ տեղեկություններ են «թափվում»: Հոգեբանների կարծիքով` դպրոցական սթրեսը կարող է դրսեւորվել տարբեր ձեւով` գերպատասխանատվությունից մինչեւ սրտխառնոց, հաղորդում է DELFI-ին:
Դրանից խուսափելու համար` մասնագետները խորհուրդ են տալիս մինչեւ ուսումնական գործընթացի մեկնարկը երեխային նախապատրաստել: Ցանկալի է, որ ծնողները երեխաների հետ ուսումնասիրեն տնից դպրոց երթուղին: Ճիշտ է, առաջին դասարանցիներին սովորաբեր ուղեկցում են, բայց ամեն դեպքում երեխան պետք է իմանա ճանապարհը:
Ադապտացիայի կարեւոր պահերից է դպրոցին ծանոթանալը: Պարզապես երեխային ցույց տալ, թե որտեղ են դասասենյակները, որտեղ է ճաշարանը, որպեսզի նրա մոտ առաջին օրը վախ չառաջանա:
Մյուս կարեւոր հարցը կարգապահությունն է: Պետք է երեխային պատրաստել քնի ճիշտ ռեժիմին, որպեսզի նա կարողանա վաղ արթնանալ: Դա կարելի է անել ամեն օր` 15 րոպե ավելի շուտ քնեցնելով:
Ծնողներին խորհուրդ է տրվում երեխաների նկատմամբ ավելի ուշադիր լինել հատկապես ուսումնական առաջին շաբաթվա ընթացքում, քանի որ երբեմն ծնողների անուշադրության պատճառով լուրջ հետեւանքներ կարող են առաջանալ:
Ըստ մասնագետների` սրթեսը կարող է տարբեր ձեւի ազդեցություն ունենալ` գրգռվածությունից եւ առավոտյան արթնանալ չցանկանալուց մինչեւ ավելի լուրջ դրսեւորումներ` սրտխառնոց, գլխացավ, փորացավ: Այդ դեպքում հարկավոր է պարզել պատճառը, խոսել նաեւ դասվարի եւ դպրոցական հոգեբանի հետ: Եւ, իհարկե, շատ կարեւոր է ծնողների հետ շփումը: Հոգեբանները ծնողներին խորհուրդ են տալիս հետաքրքրվել ոչ միայն գնահատականներով, այլեւ դասարանի հետ հարաբերություններով, դպրոցական կյանքին մասնակցությամբ:
