Ինչո՞ւ կառավարությունը մերժեց ԲՀԿ-ին. Ըստ նախարարի՝ նվազագույն աշխատավարձի կտրուկ բարձրացումը կարող է ավելացնել ստվերը

ԱԺ ԲՀԿ-ական խմակցության պատգամավորներ Նաիրա Զոհրաբյանը, Միքայել Մելքումյանը, Ստեփան Մարգարյանը և Վահե Հովհաննիսյանն օրենսդրական նախագիծ էին ներկայացրել՝ առաջարկելով 2014 թ. հունվարի 1-ից նվազագույն աշխատավարձը սահմանել 75 հազար դրամ, մինչդեռ կառավարությունը մտադիր է նման սահմանագծի հասնել աստիճանաբար, առաջիկա տարիների ընթացքում, և այսօր նիստում դեմ որոշում կայացվեց ներկայացված նախագծի ընդունմանը:

Նախագծի հիմնավորման մեջ նրանք նշել էին, որ «Նվազագույն ամսական աշխատավարձի մասին» Հայաստանի Հանրապետության օրենքում ներկայացվող փոփոխությունների ընդունումը պայմանավորված է Հայաստանի Հանրապետության բնակչության օրեցօր վատթարացող սոցիալական վիճակի, ձեռնարկատիրական ոլորտում, այդ թվում` հատկապես փոքր եւ միջին բիզնեսում արդյունավետ աշխատելու պայմանների բարելավման, երկրում բնակչության վճարունակ պահանջարկի բարձրացման անհրաժեշտությամբ: Նրանք նշել էին, որ նվազագույն աշխատավարձի շեմի կտրուկ բարձրացումը, այն է 75.000 ՀՀ դրամ, արմատական, նաև արդյունավետ միջոց է խթանելու ներքին սպառողական պահանջարկը, լուծելու մի կողմից` մեր համաքաղաքացիների արժանապատիվ կենսապահովման խնդիրը, մյուս կողմից` ապահովելու լրացուցիչ դրամական միջոցներ բնակչության համար: Դրա արդյունքում էապես կմեղմվի սոցիալական լարվածությունը, հարաբերականորեն կավելանան կոմունալ ծա-ռայությունների, սննդամթերքի եւ այլ ապրանքների շուկաներում իրացման ծավալները, քա¬նի որ ՀՀ-ում բնակչության սպառման սահմանային գործակիցը բավականին մեծ է:

Լրագրողների հետ զրույցում ՀՀ աշխատանքի և սոցիալական հարցերի նախարար Արտեմ Ասատրյանը պարզաբանեց, թե նվազագույն աշխատավարձերի չափերի բարձրացում արդեն նախատեսված է և դա առավելագույնն է, որ կարելի է անել ներկայում. «Նվազագույն աշխատավարձի բարձրացումը ազդակ է ոչ պետական հատվածին, թե ինչպիսին պետք է լինեն աշխատավարձերը երկրում: Եթե կտրուկ փոփոխությունների գնանք, դա կարող է բերել ավելի վատ սոցիալական հետևանքների: Մասնավորապես՝ մենք կարող ենք ունենալ գործազրկության ավելի բարձր մակարդակ, զբաղվածության անկում, ավելի մեծ ստվեր: Հետևաբար՝ բոլոր կողմերը պետք է հաշվի առնվեն՝ ցանկացած որոշում կայացնելիս»:
Ըստ նրա՝ ռեալ է արդեն 2017 թ-ին Հայաստանում նվազագույն աշխատավարձը 90 հազար դրամ սահմանելու ծրագիրը, ինչը հավասարակշռված է. «Մենք նաև բիզնեսին հնարավորություն պետք է տանք վերակառուցելու իր աշխատանքը»:

Ավելացնենք նաև, որ ըստ կառավարության եզրակացության, նախագծի ընդունման արդյունքում պետբյուջի ծախսերը կավելանան լրացուցիչ 177 միլիարդ դրամով։