Ջոն Քերին Մոհամմեդ Մուրսիի պաշտոնանկ արվելը որակել է որպես «ժողովրդավարության վերականգնում»
Ամերիկյան The New York Times թերթի փոխանցմամբ՝ ԱՄՆ պետքարտուղար Ջոն Քերին Եգիպտոսի նախագահ Մոհամմեդ Մուրսիի գահընկեցությունը որակել է որպես «ժողովրդավարության վերականգնում»: Նշվում է, որ Քերին իր այս հայտարարությունն արել է Պակիստանում:
Քերին զինվորականների կողմից իրականացված իշխանափոխությունը պայմանավորել է Եգիպտոսի միլիոնավոր քաղաքացիների համապատասխան խնդրանքով, որոնք զինվորականներին կոչ են արել միջամտել իրավիճակին և երկիրը փրկել քաոսից: Դրանով իսկ պաշտոնական Վաշինգտոնը հրաժարվել է Մուրսիի հեռանալը ճանաչել որպես ռազմական հեղաշրջում:
Հակառակ դեպքում ԱՄՆ-ը հարկադրված կլիներ հրաժարվել Եգիպտոսի հետ ռազմական համագործակցությունից և այլևս Կահիրեին տարեկան չփոխանցել 1.5 միլիարդ դոլար՝ որպես օգնություն:
