Զառա Հովհաննիսյան. Ինչո՞ւ է պետք նորից՝ մեկ տարի անց, վերադառնալ «Հարսնաքարի» խնդրին, ո՞ւմ է պետք, ինչո՞ւ է պետք, ես դեռ չեմ կարող ասել
Ինչպես հայտնի է՝ «Վահե Ավետյան» հասարակական շարժումն այսօր հաղորդագրություն է տարածել, որով տեղեկացնում է, որ այսօր պատրաստվում են պիկետ անցկացնել «Հարսնաքար» ռեստորանային համալիրի մոտ:
168.am-ը «Պահանջում ենք պատժել «Հարսնաքարում» տեղի ունեցածի բոլոր մեղավորներին» խմբի անդամ, հրապարակախոս Զառա Հովհաննիսյանից հետաքրքրվեց՝ արդյոք վերջինս մասնակցելո՞ւ է այդ պիկետին և ճի՞շտ է արդյոք համարում այնտեղ անցկացվող հարսանեկան արարողություն անցկացնելու մտադրությունն «անբարո» անվանելը:
Հիշեցնենք, որ այսօր «Հարսնաքարում» տեղի է ունենալու էստրադային երգիչներ Մարտին Մկրտչյանի և Հռիփսիմե Հակոբյանի հարսանեկան արարողությունը:
Մեզ հետ զրույցում Զառա Հովհաննիսյանն ասաց, որ այդ պիկետին չի մասնակցելու՝ պիկետի անկանխատեսելիության պատճառով: «Ես ընդհանրապես մասնակցում եմ ցանկացած այն միջոցառմանը, որն ունի որոշակի մշակված ռազմավարություն, թե ինչու է դա արվում, և ուր պիտի հասցվի: Ես չեմ կարող մասնակցել մի միջոցառման, որը չգիտեմ, թե ինչպես է ավարտվելու կամ ընդհանրապես ինչո՞ւ է կազմակերպվել»,- ասաց նա:
Զառա Հովհաննիսյանի խոսքով՝ ի սկզբանե որոշված էր, որ պետք է պայքարը շարունակական լիներ, սակայն ինքը չի հասկանում՝ ի՞նչն էր պատճառը, որ այդ պայքարն ընդհատվեց. «Ի սկզբանե որոշված էր, որ պետք է շարունակվեր, հետո ընդհատվեց: Խմբի անդամների՝ տարբեր այլ քաղաքական պրոցեսների մեջ մտնելուց հետո նորից վերադառնալ «Հարսնաքարի» խնդրին, ես ուղղակի չեմ հասկանում, թե դա ինչո՞ւ է արվում: Դրա համար չեմ կարող ինձ համար անբացատրելի, անմեկնելի գործողությունների մասնակցել»:
Նրա խոսքով՝ «Պահանջում ենք պատժել «Հարսնաքարում» տեղի ունեցածի բոլոր մեղավորներին» խումբը «Վահե Ավետյան» հասարակական շարժումից միշտ ունեցել է մարտավարական տարբերություններ. Առաջինը՝ հարցը դրել է իրավական տեսանկյունից, իսկ երկրորդը՝ բարոյա-խրատական տեսանկյունից:
Զառա Հովհաննիսյանից նաև հետաքրքրվեցինք՝ արդյոք վերջինս համաձա՞յն է «Հարսնաքարում» հարսանիք կազմակերպելու մտադրությունը «անբարո» համարելուն: «Մենք ընդհանրապես ի սկզբանե, երբ որ տեղի ունեցավ Վահե Ավետյանի դեպքը, մենք ամեն կերպ պնդում էինք, որ «Հարսնաքարը» ճանաչվի որպես մարդու կյանքի համար վտանգավոր տարածք, և որ, բացի հասարակական ճնշումներից, նաև իրավական գնահատական տրվի: Բայց քանի որ մի քանի տարբեր նախաձեռնություններ էին, և տարբեր ուղղություններով էր գնում այդ պայքարը, կարելի է ասել՝ ոչ միասնականորեն, և այսօրվա դրությամբ ինչո՞ւ է պետք նորից՝ մեկ տարի անց, վերադառնալ «Հարսնաքարի» խնդրին, ո՞ւմ է պետք, ինչո՞ւ է պետք, ես դեռ չեմ կարող ասել»,- ի պատասխան մեր հարցին՝ ասաց Զառա Հովհաննիսյանը:
Նաև հետաքրքրվեցինք՝ արդյոք ճի՞շտ է հենց հարսանեկան արարողության օրը ռեստորանային համալիրի դիմաց պիկետ անցկացնելը:
«Անմիջապես Վահե Ավետյանի մահվան հաջորդ օրը, երբ առաջին անգամ կազմակերպվեց մոմավառությունը «Պահանջում ենք պատժել «Հարսնաքարում» տեղի ունեցածի բոլոր մեղավորներին» մեր նախաձեռնության կողմից (մենք ենք առաջին անգամ այնտեղ մոմավառության կոչ արել), այնտեղ հարսանիք կար: Եվ որպես կազմակերպիչներից մեկը՝ ինձ անընդհատ գրում էին facebook-ով, խնդրում ենք՝ մի՛ խափանեք, ընկերոջս հարսանիքն է: Ես նույն մարդկանց հակադարձեցի, որ ընդամենը 12 օր առաջ այնտեղ բժիշկ են ծեծել և մահվան հասցրել: Դուք չգիտեի՞ք, որ այնտեղ այդպիսի դեպք է եղել, և դուք այնտեղ հարսանիք եք նշանակում: Այսինքն՝ դա երկուստեք է, հասարակությունն էլ պետք է հասնի այդ գիտակցությանը, որ այն տարածքում, որտեղ մարդ են սպանել՝ ուղղակի անհնար լինի իր գիտակցության համար հարսանիք անելը»,- պատասխանեց Զառա Հովհաննիսյանը՝ նշելով, որ չգիտի՝ ինչո՞ւ են մարդիկ որոշել այնտեղ հարսանիք կազմակերպել:
Ըստ նրա՝ միգուցե այդ մարդիկ արդեն մոռացե՞լ են՝ ինչ է տեղի ունեցել մեկ տարի առաջ այդ ռեստորանային համալիրում: Այդ իսկ պատճառով. Զառա Հովհաննիսյանը կարծում է, որ ամբողջ տարվա ընթացքում պետք է կազմակերպվեին պիկետներ և զանազան ակցիաներ, որպեսզի հանրությունը չմոռանար տեղի ունեցածի մասին:
Զառա Հովհաննիսյանը նշեց, որ իրենց հաճախ հարցնում են՝ ինչո՞ւ ակցիաները չեն շարունակվում: Ըստ նրա՝ խումբն ամբողջովին, հատվածայնորեն տարրալուծվել է քաղաքական դաշտում: «Կեսը «Ժառանգության» մեջ են, կեսը՝ ՀԱԿ-ի անդամ են: Շատ դժվար է այդ խումբը նորից ետ հավաքելը: Մի քանի հոգի է մնացել, որ, կարելի է ասել, ազատ մարդիկ են, իսկ թե ինչո՞վ է զբաղված Նախախորհրդարանը, ես քաղաքական իմաստով չեմ կարող ասել: Անբացատրելի են ինձ համար իրենց գործողությունների ամբողջ տրամաբանությունը, դրա համար ես նախաձեռնություններին դժվար թե կարողանամ մասնակցել»,- ասաց Զառա Հովհաննիսյանը՝ հավելելով, որ քաղաքացիական նախաձեռնության մասնակցությունը ցանկացած քաղաքական պրոցեսի իր համար «պրոբլեմատիկ է»:
«Դրանից հետո քաղաքացիական նախաձեռնության բոլոր քայլերը ինձ համար արդեն կասկածի տակ են»,- մեզ հետ զրույցում ասաց նա:
