2800-ից ավելի վիրտուալ ծաղիկներ են դրել Ծիծեռնակաբերդում
Բոլոր նրանք, ովքեր այսօր ֆիզիկապես չեն գտնվում Հայաստանում և/կամ չեն կարողանա գնալ Ծիծեռնակաբերդ և իրենց հարգանքի տուրքը մատուցել Եղեռնի զոհերի հիշատակին, կարող են դա անել online: Այս մասին 168.am-ի հետ զրույցում ասաց Memcosoft ընկերության տնօրեն Արման Զաքարյանը: Նրա խոսքով՝ այդ ամենը կարելի է անել երկու տարբերակով. կամ այցելել Ցեղասպանության թանգարան- ինստիտուտի ինտերնետային կայք, որի աջ մասում կարելի է տեսնել Ցեղասպանության թանգարան-ինստիտուտ այցելելու վիրտուալ հնարավորությունը:
Ի դեպ, նշենք, որ ներկայում Ցեղասպանության ինստիտուտ-թանգարանի վիրտուալ այցելությունների թիվն ավելի քան 12 հազար է:
Կամ կարելի է ներբեռնել հավելումը՝ այստեղ, և դրանից օգտվելով՝ վիրտուալ շրջել Ծիծեռակաբերդի բարձունքում և Եղեռնի զոհերի հուշահամալիրում ծաղիկներ դնել:
Նշենք, որ ներկայում այսկերպ դրված վիրտուալ ծաղիկների թիվը 2800-ից ավելի է:
Ա. Զաքարյանի տեղեկացմամբ, այս ամենը պատրաստել և Ցեղասպանության ինստիտուտ-թանգարանին է նվիրել իր ղեկավարած ընկերությունը 2011թվականին, սակայն տարեցտարի վիրտուալ այցելության հնարավորությունն ավելի է կատարելագործվում:
Հավելումը ներկայում հասանելի է դեռևս միայն համակարգչի միջոցով, սակայն Ա. Զաքարյանի խոսքով՝ նախատեսվում է ստեղծել դրա տարբերակը՝ շարժական սարքերի համար, որպեսզի այն հասանելի լինի սմարթֆոններով և պլանշետներով:
