Վրացական ՀԿ-ն կառավարությանը կոչ է արել ճանաչել Հայոց ցեղասպանությունը
Ռուսական Regnum լրատվական գործակալության փոխանցմամբ՝ վրացական հասարակական կազմակերպություն «Հերակլ 2» համայնքը ողջնում է բազմաթիվ ժողովրդավարական երկրների կողմից Հայոց ցեղասպանության ճանաչումը և Վրաստանի կառավարությանը կոչ է անում հետևել ժողովրդավարական համագործակցության օրինակին:
Կազմակերպության ղեկավար Արչիլ Չկոիձեն հայտարարել է, որ ապրիլի 17-ին «Ամբասադոր» հյուրանոցում կայանալիք կոնֆերանսում իրենք հերթական անգամ կոչ են անելու ճանաչել Հայոց ցեղասպանությունը: Այդ կոնֆերանսին մասնակցելու է նաև Թբիլիսիի հայերի ասամբլեան:
Չկոիձեն հավելել է, որ կոնֆերանսի մասնակիցները մեկ րոպե լռությամբ հարգելու են 1915 թվականին Օսմանյան կայսրության կողմից իրականացված Հայոց ցեղասպանության զոհեի հիշատակը՝ ընդգծելով, որ Վրաստանի նախկին կառավարությունը կատարելապես անհիմն է ճանաչել չերքեզ ժողովրդի ցեղասպանությունը, ինչը չի արել ժողովրդավարական և ոչ մի պետություն:
Կոնֆերանսի ժամանակ քննարկվելու են հայ-վրացական հարաբերությունները, պատմությունը կեղծելու փորձերը, որոնք միտված են երկու բարեկամ ժողովուրդների միջև թշնամանք մտցնելուն:
