Թուրքիայում շարունակվում է մոտ 2000 տարվա ժայռափոր եկեղեցու վերանորոգումը
Թուրքական Anadolu լրատվական գործակալության փոխանցմամբ՝ Թուրքիայում շարունակվում են քրիստոնյաների համար ուխտատեղի հանդիսացող Սուրբ Պետրոս ժայռափոր եկեղեցու վերանորոգման աշխատանքները:
Դրանք մեկնարկել են 2012 թվականի սեպտեմբերին: Անթաքիայում (Անտիոք) գտնվող այդ եկեղեցու վերանորոգման մեկնարկի արարողակարգին ներկա է գտնվել Թուրքիայի արդարադատության նախարար Սադուլլահ Էրգինը:
Եկեղեցու վերանորոգումը կարևորվում է տարածաշրջանում զբոսաշրջությանը զարկ տալու տեսանկյունից: Եկեղեցին կառուցվել է մեր թվարկության 30-ական թվականներին: Այն գտնվում է 13 մետր խորություն, 9.5 մետր լայնություն և 7 մետր բարձրություն ունեցող անձավի մեջ: Բարեկարգվելու է նաև եկեղեցու շրջակայքը, կառուցվելու է սրճարան և եռահարկ շինություն:
Ակնկալվում է, որ ամեն տարվա հունիսի 29-ին Կաթոլիկ եկեղեցին պատարագ կանցկացնի այս եկեղեցում, որին կմասնակցեն նաև Վատիկանի ներկայացուցիչները:
