Հանրային խորհրդի քննարկումը` ճաշից հետո մանանեխ
Հարային խորհուրդն այսօր կազմակերպել էր հասարակություն-կառավարություն «երկխոսություն», որին մասնակցում էին 30-ից ավելի հասարակական կազմակերպությունների ներկայացուցիչներ, արվեստի ու մշակույթի գործիչներ: Քննարկման թեման ԱԳՆ շենքի վաճառքն էր:
Ներկաների կարծիքով՝ ԱԳՆ-ի շենքը վաճառելը հավասարազոր էր ազգային դավաճանության: Չնայած, որ ՀՀ Կառավարությանն առընթեր Պետական գույքի կառավարման վարչության պետի տեղակալ Աշոտ Մարկոսյանը մանրամասն ներկայացրեց վաճառքի հետ կապված թղթաբանական հիմքերը, բայց դա ամենևին էլ չփոխեց ներկաների տեսակետը: Ըստ Ա. Մարկոսյանի՝ գործարքը համարվում է բավականին արդյունավետ, և Կառավարության միակ պահանջը սեփականատիրոջից այն է, որ պահպանվի հուշարձանի պատմամշակութային տեսքն ու արժեքը:
Սակայն այս հարցում ամենևին էլ լավատես չէ «Պետական կարիքների զոհեր» ՀԿ նախագահ Սեդրակ Բաղդասարյանը: Նա կորցրել է լավատեսությունը Կառավարության որոշումներն անփոփոխ պահելու և դրանք չխախտելու հարցում. «Հյուսիսային պողոտան կառուցելու համար քանդվեցին 30 պատմամշակութային արժեք ներկայացնող շենքեր, բացի այդ, նույն կառավարության որոշման համաձայն այնտեղ պետք է կառուցվեին հինգհարկանի շենքեր: Բայց կյանքը ցույց տվեց, որ Հյուսիսային պողոտայում ոչ միայն կառուցեցին բարձրահարկ շենքեր, այլև չկատարեցին մեկ այլ որոշում` Լալայանց փողոցի վրա չկառուցվեցին պլանավորված երկու-երեք ազգագրական շենքերը: Ցավով եմ արձանագրում, որ մեր երկրում չվաճառվող ապրանք չկա, և այնպիսի տպավորություն է, որ եթե լավ փող տան, մեզ էլ կվաճառեն: Իսկ այս քննարկումը կրում է ձևական բնույթ, քանի որ ոչինչ հնարավոր չի լինի փոխել»:
ՀՀ Կառավարությանն առընթեր Պետական գույքի կառավարման վարչության քաղաքականության վարչության պետ Արտաշես Թարլամազյանի կարծիքով՝ այս քննարկումը կազմակերպելը բոլորովին էլ ժամանակավրեպ չէ և լավ հնարավորություն է հասարակությանը տեղեկացնելու գործարքի մանրամասների և հետագա նպատակների մասին: «Հասարակությունը հնարավորություն ունի համոզվելու, որ գործարքը չափազանց նպատակահարմար էր, օրենքի շրջանակներում և արդյունավետ: Պետական գույքը տնտեսական շրջանառության մեջ է դրվել, որի արդյունքում եկամուտ կապահովի նույն պետությանը»,- ասում է Ա. Թարլամազյանը:
Հանրային խորհրդի անդամ, ՀԽ ձեռնարկատիրության և սպառողների հարցերի հանձնաժողովի նախագահ Արշակ Սադոյանի կարծիքով՝ արդյունքի հասնելու տեսանկյունից մեր երկրում կարևորագույն հարցերի հանրային քննարկումն իսկապես ժամանակավրեպ է, բայց նաև օգտակար է հասարակություն- պետական մարմիններ երկխոսության ձևավորման առումով: Որպես հին երևանցի նա կարծում է, որ Թամանյանական ծրագրից շեղվելը ցավալի է, ուր մեծացել են բազմաթիվ սերունդներ և երկրի, սերունդների հետագա զարգացման շարունակականության պահպանման տեսակետից հանցագործություն է: Բայց հավատում է, որ կպահպանվի գոնե արտաքին տեսքը:
«Նման հարցերը մինչև կառավարության օրակարգ մտնելը պետք է ներկայացվեն հասարակության դատին և քննարկման արդյունքում նոր կկայացվեին որոշումներ: Համաժողովրդական ունեցվածքի տնօրինումը չի նշանակում տեր լինել, կառավարությունը իրականացնողն է, իսկ որոշողը ժողովուրդն է, ժողովրդի իշխանություն գաղափարն այնքան է աղճատված, որ ցավոք սրտի դադարել ենք նեղանալ», – ասում է Արշակ Սադոյանը:
«Փաստինֆո»
