Երևանում ոստիկանների համազգեստով թալանել են հյուրանոցում գտնվողներին. 7 ձերբակալված կա
Ոստիկանությունը հայտնաբերել ու ձերբակալել է 7 անձանց, որոնք հոկտեմբերի 10-ին ոստիկանության համազգեստով և դիմակներով մուտք են գործել Երևանի Քեռու փողոցում գտնվող հյուրանոց ու թալանել այնտեղ գտնվող անձանց։ Տեղեկությունը հայտնում է ՀՀ ՆԳՆ ոստիկանությունը։
Նրանք մուտք են գործել հյուրանոցի տարբեր սենյակներ, զենքի սպառնալիքով, ոմանց էլ կապկպելով` հափշտակել են բջջային հեռախոսներ, գումար և դիմել փախուստի
Ավազակային խումբը բաղկացած է եղել 9 անձից։
Իրավապահները դեպքի վայրին հարակից տարածքում հայտնաբերել են 4 բջջային հեռախոս, պնևմատիկ ատրճանակ, դիմակներ ու ձեռնոցներ։
«Ենթադրեցինք, որ հանցանք կատարած անձինք փախուստի ժամանակ դիտավորությամբ նետել էին դիմակներն ու ձեռնոցները, իսկ հափշտակած բջջային հեռախոսների մի մասն ու ատրճանակն ընկել էին իրենց կամքից անկախ հանգամանքներում, քանի որ հեռանալու ճանապարհը կտրուկ վայրէջք էր»,- մանրամասները ներկայացրել է ավագ քրեական ոստիկան Դավիթ Բաբինյանը:
Պարզվել է, որ ավազակությունը կատարած 9 տղամարդկանցից մեկը մայրաքաղաքի Ֆրիկի փողոցի բնակիչ է` 41 տարեկան, իսկ մյուսները` օտարերկրացիներ։
Հետագա համատեղ միջոցառման շնորհիվ հոկտեմբերի 10-ի երեկոյան Երևանի բնակիչը հայտնաբերվել ու ձերբակալվել է։ Հաջորդ օրն առավոտյան ձերբակալվել են նաև 38 տարեկան 2 օտարերկրացիներ։ Նույն օրը Մեղրիի անցակետում հայտնաբերվել են նրանցից ևս 4–ը։
Միջոցառումները շարունակվում են հանցանքին մասնակից ևս երկու անձանց հայտնաբերելու ուղղությամբ։
Ձերբակալված անձանց խուզարկություններով հայտնաբերվել են գողոն հանդիսացող իրեր` պլանշետներ, բջջային հեռախոսներ և գումար։
