Չի՛ կարող Հայաստանում կոնյակ արտադրվել. ինչպես է Փաշինյանը հողին հավասարեցնում հայ կոնյակագործների աշխատանքը
Հայաստանի և Վրաստանի վարչապետների հանդիպման ժամանակ քննարկված թեմաներից մեկը ապրանքների որակի ստանդարտների հարցն է եղել։ Այս մասին խորհրդարանում կառավարության հետ հարցուպատասխանի ժամանակ հայտարարեց Նիկոլ Փաշինյանը:
Փաշինյանի խոսքով՝ ոչ բոլոր ընկերություններն են հետևում որակի և գործարար էթիկայի նորմերին, և դրա հետևանքների հետ նա ստիպված է գործ ունենալ միջազգային ասպարեզում:
Նա նշեց, որ դեռ 2018 թվականից է տնտեսվարողներին ասել, որ պետք է ստանդարտներ լինեն։
«Ինչի՞ պետք ա ես գնամ միջազգային կազմակերպություն կամ միջազգային այցի ընթացքում, միջազգային հեղինակավոր արտադրող կազմակերպությունն ինձնից հանդիպում խնդրի, ես մտածեմ՝ երևի էս կազմակերպություն ուզում ա Հայաստանում ներդրում անի, բայց կազմակերպությունները հերթով գան, ասեն՝ ձեր երկրում էս արտադրանքն են կեղծում, էն արտադրանքն են կեղծում։ Հետո էլ ասենք, թե հիմա рычаг-ը քաշենք, պրոբլեմներ կլինեն»,- ասաց Փաշինյանը։
Նաև հավելեց. «Հայաստանում չի կարող կոնյակ արտադրվել, ոնց որ Դիլիջանում չի կարող ջերմուկ արտադրվել։ Հայաստանում չի կարող շամպայն արտադրվել։ Մեր մեծագույն պրոբլեմն էն ա, որ մենք մի պատուհան ունենք ու ամբողջ աշխարհը տենում ենք էդ պատուհանից, ու էդ պատուհանը թափանցիկության հարց ունի»։
ՔՊ խմբակցության պատգամավոր Սերգեյ Բագրատյանը հետաքրքրվեց, թե որքանով է տեղին Վրաստանի իշխանությունների կողմից խոչընդոտել հայկական ապրանքների տարանցումը դեպի Ռուսաստան, եթե այդ ապրանքը Ռուսաստանում վաճառվում է:
Ի պատասխան Փաշինյանը հայտարարեց, որ ամեն դեպքում Հայաստանը չպետք է իրեն թույլ տա արտահանել «չայով գույն տված յաթրջի արաղը, որի անունը դրած ա կոնյակ»։
