ԱԳ փոխնախարար. Հայաստանի մոտեցումները համահունչ են ՄԽ հայտարարություններին
ԵԱՀԿ Անվտանգության համագործակցության ֆորումի լատվիական նախագահության հրավերով Հայաստանի ԱԳ փոխնախարար Աշոտ Հովակիմյանը ելույթով հանդես է եկել ԱՀՖ լիագումար նիստում:
ԱԳ փոխնախարարը ներկայացրել է ՀՀ մոտեցումները ԵԱՀԿ տարածաշրջանի անվտանգությանն առնչվող հարցերի վերաբերյալ, անդրադարձել նաեւ ԵԱՀԿ երեւանյան գրասենյակի եւ ՀՀ պաշտպանության նախարարության միջեւ ընթացող համագործակցությանը եւ այդ շրջանակներում ՀՀ զինված ուժերում ժողովրդավարական կառավարման ամրապնդմանն ուղղված ծրագրերին:
Փոխնախարար Հովակիմյանը հանգամանալից ներկայացրել է ՀՀ մոտեցումները ԼՂ հիմնահարցի կարգավորման մասին: Մասնավորապես, ընդգծվել է այն հանգամանքը, որ այդ մոտեցումները համահունչ են Մինսկի խմբի համանախագահ երկրների ղեկավարների Լ’Աքվիլայի, Մուսկոկայի, Դովիլի եւ Լոս-Կաբոսի հայտարարություններին:
Անդրադառնալով Ադրբեջանի կողմից Հայաստան-Ադրբեջան սահմանի, ինչպես նաեւ Արցախի ու Ադրբեջանի միջեւ շփման գծի ողջ երկայնքով կազմակերպած սադրանքների ինտենսիվության աճին` կարեւորվել է դիպուկահարների հետքաշումը, ինչպես նաեւ հրադադարի խախտումները հետաքննող մեխանիզմի ստեղծումը:
Ելույթներով հանդես են եկել նաեւ ԵՄ, ՌԴ, ԱՄՆ եւ ԵԱՀԿ-ում նախագահող Իռլանդիայի պատվիրակությունները:
ԵՄ ներկայացուցիչն աջակցություն է հայտնել ԼՂ հիմնախնդրի խաղաղ կարգավորմանն ուղղված Մինսկի խմբի համանախագահների ջանքերին, վերահաստատել շփման գծում հնարավոր միջադեպերի ուսումնասիրման նպատակով մեխանիզմների իրագործման կարեւորությունը, որը համաձայնեցվել է 2012թ. հունվարին Սոչիի գագաթնաժողովի շրջանակներում Հայաստանի եւ Ադրբեջանի նախագահների միջեւ, ինչպես նաեւ ողջունել ԵԱՀԿ երեւանյան գրասենյակի գործունեությունը:
ԱՄՆ, ՌԴ եւ Իռլանդիայի պատվիրակությունները վերահաստատել են ԼՂ հիմնախնդրի` բացառապես խաղաղ ճանապարհով կարգավորման վերաբերյալ իրենց ավանդական դիրքորոշումը:
