Արտահերթ նստաշրջան չի հրավիրվի
Հայ ազգային կոնգրեսի խորհրդարանական խմբակցությունը «Հարսնաքարի» հարցով արտահերթ նստաշրջան գումարելու համար ընդամենը կարողացել է հավաքել 21 ստորագրություն: Այս մասին տեղեկացրեց ԱԺ «Ժառանգություն» խմբակցության անդամ Ալիկ Արզումանյանը:
Հիշեցնենք, որ արտահերթ նստաշրջան գումարելու համար անհրաժեշտ էր 44 ստորագրություն: Սակայն պարզվում է, որ նախաձեռնությանը միացած խորհրդարանական 4 խմբակցությունների ոչ բոլոր պատգամավորներն են ստորագրել արտահերթ նիստ գումարելու ձևաթուղթը: Օրինակ՝ ԲՀԿ-ի 37 պատգամավորներից ընդամենը 7-ն են ստորագրել: Մյուսներն, ըստ ԲՀԿ գործիչների պատճառաբանության, բացակայում են երկրից և չեն կարողացել միանալ ստորագրահավաքին: Արդյունքում` «Հարսնաքարի» գործով արտահերթ նիստ չի գումարվի:
