Իվանիշվիլին Սաակաշվիլուն ու նրա կողմնակիցներին առաջարկել է նախևառաջ Դոնբաս ուղարկել իրենց զավակներին
Վրացական «Իմեդի» հեռուստաընկերությանը երեկ տված հարցազրույցի ժամանակ Վրաստանի նախկին վարչապետ, միլիարդատեր Բիձինա Իվանիշվիլին հայտարարել է, որ Ուկրաինայում Ռուսաստանի ներկայիս քաղաքականությունը սպառնալիք է ներկայացնում ինչպես տարածաշրջանի, այնպես էլ համայն աշխարհի համար:
Իվանիշվիլին Ռուսաստանի ու Աբխազիայի միջև դաշնակցային պայմանագիր ստորագրելը որակել է որպես վրացական տարածքների բռնակցման ուղղությամբ հերթական քայլ:
Իվանիշվիլին սխալ է համարում Վրաստանի նախկին իշխանությունների ու անձամբ նախկին նախագահ Միխեիլ Սաակաշվիլու այն կոչերը, որ վրացիները պատերազմեն Ուկրաինայում:
Իվանիշվիլին նախկին նախագահին ու նրա կողմնակիցներին առաջարկել է նախևառաջ այնտեղ ուղարկել իրենց զավակներին: Ուկրաինայում արդեն իսկ զոհվել է Վրաստանի երկու քաղաքացի:
Իվանիշվիլին ընդգծել է, որ որևէ վատ բան չկա նրանում, որ բարեկամական Ուկրաինայում պաշտոններ ստանան այն վրացիները, որոնք չեն գտնվում հետախուզման մեջ, սակայն այդ անձինք խայտառակել են իրենց Վրաստանում և հետևաբար նույն սխալները կարող են գործել նաև այնտեղ:
