BMW-ն պատրաստվում է էլեկտրամոբիլների վաճառքն ավելացնել
Bayerische Motoren Werke AG (BMW) գերմանական ավտոմոբիլաշինական ընկերությունը մտադիր է 2017 թվականին էլեկտրամոբիլների վաճառքներն ավելացնել մեկ երրորդով՝ դրանք հասցնելով ավելի քան 100 հազարի: Այս մասին կոնցեռնի ղեկավար Հարալդ Քրյուգերը հայտարարել է Suddeutsche Zeitung-ին տված հարցազրույցում:
2016 թվականի արդյունքներով սպասվում է, որ BMW-ն կվաճառի 60 հազար էլեկտրամոբիլ: Այսպիսով, 2013-2016 թվականների միագումար վաճառքները կկազմեն 100 հազար էլեկտրամոբիլ, հայտնում է Deutsche Welle-ն:
Քրյուգերի խոսքով՝ BMW-ն այժմ առաջարկում է դասական մակնիշների էլեկտրամոբիլներ եւ մոդելային շարքեր:
«Ես կարծում եմ, որ 2025 թվականին հիբրիդային եւ էլեկտրական ավտոմեքենաների մեր շուկայական բաժինը կկազմի 15 տոկոսից մինչեւ 25 տոկոս»,- ասել է BMW-ի ղեկավարը, հաղորդել է «Ինտերֆաքս»-ը:
