Բելառուսի ու Ղազախստանի նախագահները քննարկել են Մինսկի հանդիպման հարցը
Ռուսական Rosbalt լրատվական գործակալության փոխանցմամբ՝ Բելառուսի ու Ղազախստանի նախագահներ Ալեքսանդր Լուկաշենկոն ու Նուրսուլթան Նազարբաևը հեռախոսազրույցի ժամանակ քննարկել են Մինսկում «Մաքսային միություն-ԵՄ-Ուկրաինա» ձևաչափով կայանալիք գագաթաժողովի նախապատրաստման հարցը:
Այս մասին նշված է Բելառուսի նախագահի պաշտոնական կայքում: Դրանում տեղ գտած հայտարարությունում նշված է, որ Լուկաշենկոն ու Նազարբաևը քննարկել են օգոստոսի 26-ին Մինսկում կայանալիք տվյալ հանդիպման կազմակերպմանն ու անցկացմանն առնչվող հարցեր: Հեռախոսազրույցի այլ մանրամասների մասին ոչինչ չի հաղորդվում:
Մինսկյան հանդիպման ժամանակ քննարկվելու է ԵՄ-ի հետ Ասոցացման համաձայնագիր ստորագրած Ուկրաինայի հետ Մաքսային միության հետագա հարաբերությունների հարցը: Սրանից առաջ հաղորդվել էր, թե Ռուսաստանի նախագահ Վլադիմիր Պուտինը կարող է Մինսկում երկկողմ հանդիպում ունենալ Ուկրաինայի նախագահ Պյոտր Պորոշենկոյի հետ:
