Թուրքիայի Ազգային հետախուզական կազմակերպության պատվիրակությունը մեկնել է Լիբանան
Թուրքական Anadolu լրատվական գործակալության փոխանցմամբ՝ Ազգային հետախուզական կազմակերպության (MIT) պատվիրակությունը կառույցի փոխտնօրեններից մեկի գլխավորությամբ մեկնել է Լիբանան՝ կապված այդ երկրում օրեր առաջ առևանգված «Թուրքական ավիաուղիներ» (THY) ընկերության երկու օդաչուներին ազատելու հետ:
MIT-ի պատվիրակությունը Լիբանանի մայրաքաղաք Բեյրութում արդեն իսկ հանդիպել է այդ երկրի ներքին գործերի նախարար Մերվան Շերբիլի հետ: Հանդիպման ժամանակ թուրքական կողմն իրազեկվել է թուրք օդաչուներին ազատելու շրջանակներոմ ձեռնարկվող քայլերի մասին:
Օգոստոսի 9-ին Բեյրութում հյուրանոց վերադառնալիս անհայտ անձանց կողմից առևանգվել են THY-ի ինքնաթիռով «Ստամբուլ-Բեյրութ» չվերթը կատարած օդաչուներ Մուրաթ Աքփընարն ու նրա օգնական Մուրաթ Աղջան:
