884 միլիոն դրամ, կամ՝ 2 միլիոն 425,440 դոլար․ ԿԳՄՍՆ-ը հերթական աստղաբաշխական դրամաշնորհն է հատկացրել հեծանվավազքի համար
Սեպտեմբերի 10-13-ը Հայաստանի Հանրապետությունում միջազգային բազմօրյա հեծանվավազք կկազմակերպվի, և այս նպատակով ՀՀ կրթության, գիտության, մշակույթի և սպորտի նախարարությունն իր հերթական խոշոր դրամաշնորհն է հատկացրել հոգեզավակ կառույցներից մեկին՝ «Սպորտի կառավարման կենտրոն» ՓԲԸ-ին։ Կողմերի միջև օրերս կնքված պայմանագրից տեղեկանում ենք՝ պայմանագրի գինը 884 միլիոն դրամ է՝ 2 միլիոն 425,440 դոլար։
Պայմանագրից տեղեկանում ենք՝ գումարի շրջանակում այս կենտրոնը պետք է ապահովի՝
- հեծանվավազքի կազմակերպման և անցկացման նպատակով համապատասխան պետական մարմինների և կազմակերպությունների միջև համակարգված համագործակցություն,
- մասնակիցների անվտանգության, ճանապարհային երթևեկության և բժշկական սպասարկման պատշաճ կազմակերպում,
- օտարերկրյա պատվիրակությունների և մասնակիցների ընդունելություն, տեղաբաշխում և ուղեկցում,
- տեղեկատվական աջակցության գործընթացների միասնական և համակարգված իրականացում։
Բայց այս գումարը հեծանվային մարաթոնի համար նախատեսված գումարի միայն մի հատվածն է։
Օրերս կառավարության նիստում ԿԳՄՍ նախարար Ժաննա Անդրեասյանը ներկայացրել է մրցաշարի անցկացման մանրամասները՝ նշելով, որ դրա համար կպահանջվի 1 մլրդ 599 մլն 527.2 հազար դրամ, որից 884 մլն դրամը նախատեսվում է հատկացնել ՀՀ կառավարության պահուստային ֆոնդից, 413 մլն 860 հազար դրամը՝ «Հայաստանի ֆիզիկական կուլտուրայի և սպորտի պետական ինստիտուտ» հիմնադրամի կողմից, իսկ 301 մլն 667.2 հազար դրամն ակնկալվում է այլ հովանավորներից։
«Սա մի ճանապարհ է, որի ժամանակ Հայաստանը շուրջ 500 կմ ճանապարհի երկարությամբ ներկայանալու հնարավորություն ունի։ Բոլոր այն համայնքները, որոնցով անցնելու են հեծանվորդները, կարող են ներկայացնել իրենց զբոսաշրջային գրավչությունը»,- նշել էր Անդրեասյանը։
