Ոստիկանությունը պնդում է, որ ապրիլի 9-ին ոչ մի ոստիկան հրազեն չի կրել
ՀՀ Ոստիկանությունը պարզաբանում է տարածել մամուլում հայտնված այն տեղեկատվության վերաբերյալ, որ ապրիլի 9-ին ծառայություն կատարող ոստիկաններից մեկը զինված է եղել ինքնաձիգով։
« «Առավոտ» օրաթերթը 23.04.2013 թ. համարում զետեղել է «Ժառանգություն» կուսակցության փոխնախագահ Արմեն Մարտիրոսյանի պնդումը, թե ապրիլի 9-ին ծառայություն կատարող ոստիկաններից մեկը զինված է եղել ինքնաձիգով:
Պաշտոնապես հայտարարում ենք, որ ապրիլի 9-ին զանգվածային միջոցառումների ընթացքում հասարակական կարգ ապահովող ոչ մի ոստիկան հրազեն չի կրել»,- նշվում է ոստիկանության հաղորդագրության մեջ:
Հիշեցնենք, որ Արմեն Մարտիրոսյանը «Առավոտ»-ի հետ զրույցում պնդել էր, որ «Բիզոն» մականունով ոստիկանը ապրիլի 9-ին ինքնաձիգով զինված է եղել. «Ի՞նչ էր անում ավտոմատավորը այդ խաղաղ ցուցարարների շրջանում»:
