Հանրապետականները կպահպանեն վերահսկողությունը ԱՄՆ Ներկայացուցիչների պալատի նկատմամբ
Հանրապետական կուսակցությունը կպահպանի վերահսկողությունը ԱՄՆ Ներկայացուցիչների պալատի նկատմամբ: Այս մասին հաղորդում է The Hill-ը։
Նշվում է, որ ամերիկյան Decision Desk HQ ծառայության տվյալներով՝ 435-տեղանոց Ներկայացուցիչների պալատում հանրապետականները կստանան մեծամասնություն կազմելու համար անհրաժեշտ 218 տեղը, իսկ դեմոկրատները՝ 209։
Ներկայացուցիչների պալատում տեղերի վերջնական բաշխումն առայժմ մնում է անորոշ, քանի որ Կալիֆոռնիայում դեռևս ընթանում է ձայների հաշվարկը: Սակայն ակնկալվում է, որ հանրապետականները ևս մի քանի ձայն կստանան:
Նոյեմբերի 5-ին ԱՄՆ-ում կայացած նախագահական ընտրությունների արդյունքներով հաղթող է ճանաչվել հանրապետական թեկնածու Դոնալդ Թրամփը։ Նախագահական ընտրություններին զուգահեռ անցկացվել են նաև Կոնգրեսի ընտրություններ։
Սենատում ևս հանրապետականները մեծամասնություն են ստացել։ Այսպիսով, կայացած ընտրությունների արդյունքներով, ԱՄՆ հանրապետական կուսակցությունը Վաշինգտոնում լիակատար վերահսկողություն կունենա։
