Իրանի բանակ․ ԱՄՆ-ն ստիպված կլինի հաշվի նստել Հորմուզի նեղուցի նոր իրողությունների հետ
Իրանական բանակի ներկայացուցիչը հայտարարել է, որ ԱՄՆ-ն ստիպված կլինի ընդունել Հորմուզի նեղուցի նոր իրողությունները՝ ընդգծելով Իրանի կողմից ռազմավարական կարևորություն ունեցող այս ջրային ուղում հաստատված կարգերի անշրջելիությունը, հայտնում է Press TV-ն։
Բրիգադի գեներալ Մոհամմադ Աքրամինիան, շաբաթ օրը Թեհրանում հավաքվածների առջև ելույթ ունենալով, հայտարարել է, որ իրանական զինված ուժերը հաստատակամ կմնան մինչև Հորմուզի նեղուցում նոր կանոնների լիակատար հաստատումը։
Մեկնաբանելով տարածաշրջանում ԱՄՆ-ի գործողությունները՝ գեներալը նախազգուշացրել է, որ եթե անտեսվեն Հորմուզի նեղուցի նոր իրողությունները, ագրեսորը կկրի զգալիորեն ավելի մեծ կորուստներ, քան նախկինում։
Նրա համոզմամբ,իրանական զինված ուժերն ունեն անհրաժեշտ մոտիվացիա և վճռականություն՝ նման գործողություններին հակազդելու համար։
Աքրամինիանը նաև հայտարարել է կյանքը հանուն երկրի ու նրա պետական կարգի պաշտպանության իրանցի զինծառայողների պատրաստակամության մասին։
Նրա վկայությամբ, չնայած հակառակորդի բազմաշերտ պաշտպանական համակարգին, իրանցի զինվորականները պահպանել են բարձր մարտական ոգին, շարունակել են մնալ հրթիռային և անօդաչու համալիրների մոտ և իրականացրել արդյունավետ գործողություններ։
Գեներալը նաև նշել է Իրանի բնակիչների մասնակցությունը գիշերային զանգվածային միջոցառումներին։ Ըստ նրա, բնակչության ակտիվությունը ոչ միայն ամրապնդել է զինծառայողների մարտական ոգին, այլև զգալիորեն բարձրացրել է «մինչև վերջին շունչը» երկիրը պաշտպանելու նրանց պատասխանատվության զգացումը։
