Վրաստանի նախագահը հանդիպել է ԵՄ պատգամավորների հետ, որոնց հետ հրաժարվել է հանդիպել խորհրդարանի նախագահը
Վրաստանի նախագահ Սալոմե Զուրաբիշվիլին հանդիպում է ունեցել աշխատանքային այցով Թբիլիսի ժամանած Գերմանիայի, Լատվիայի, Լիտվայի, Լեհաստանի, Ֆինլանդիայի, Ֆրանսիայի, Շվեդիայի և Էստոնիայի օրենսդիր մարմինների ներկայացուցիչների հետ, մինչդեռ Վրաստանի խորհրդարանի խոսնակ Շալվա Պապուաշվիլին հրաժարվել է հանդիպել նրանց հետ։
«Ինտերֆաքս» գործակալությունը հաղորդում է, որ Զուրաբիշվիլիի կարծիքով՝ Վրաստանը մտնում է խորը քաղաքական ճգնաժամ, որից կարելի է դուրս գալ նոր խորհրդարանական ընտրությունների շնորհիվ, և այդ հարցում նրան կօգնի Եվրոպան։
«Վրաստանը մտնում է խորը քաղաքական ճգնաժամ, մեր եվրոպացի ընկերները եկել են մեզ մոտ, և դա լավ նշան է այն բանի, որ Եվրոպան մեզ չի թողնում իր ձեռքից, և Եվրոպայում հավատում են Վրաստանին ու նրա ժողովրդին», – ասել է նա հանդիպումից հետո կայացած մամուլի ասուլիսում։
Թբիլիսի ժամանած եվրոպացի պատգամավորները նույնպես հայտարարել են, որ Վրաստանում անցկացված ընտրությունները բազմաթիվ հարցեր են առաջացրել դրանց լեգիտիմության վերաբերյալ։«Վերջին ընտրությունները Վրաստանում ազատ և արդար չեն եղել:
Ըստ միջազգային և տեղական դիտորդների՝ ընտրությունների ժամանակ չի պահպանվել քվեարկության գաղտնիությունը, արձանագրվել են ընտրակաշառքի դեպքեր, ինչը բազմաթիվ հարցեր է առաջացրել այս ընտրությունների օրինականության վերաբերյալ», – մամուլի ասուլիսում հայտարարել է Գերմանիայի Բունդեսթագի արտաքին գործերի խորհրդարանական հանձնաժողովի նախագահ Միխայել Ռոթը՝ նշելով ընտրությունների կեղծման փաստերի անկախ հետաքննության անհրաժեշտության մասին։
Մի քանի տասնյակ վրացի ընդդիմադիրներ, ի նշան նախագահ Զուրաբիշվիլիի և եվրոպացի պատգամավորների հետ համերաշխության, նոյեմբերի 11-ին հավաքվել են Թբիլիսիի նախագահական պալատի շենքի մոտ։ Իր հերթին Վրաստանի խորհրդարանի նախագահ Շալվա Պապուաշվիլին հրաժարվել է հանդիպել ԵՄ օրենսդիր մարմինների ներկայացուցիչների հետ։
Պապուաշվիլին նշել է, որ պատվիրակության որոշ անդամներ խորհրդարանական ընտրություններից առաջ քննադատել են Վրաստանի իշխանություններին և քաղաքացիներին կոչ արել քվեարկել ընդդիմության օգտին, ինչը Վրաստանի ընտրական օրենսդրության խախտում է
