Լոնդոնի քաղաքապետը կոչ է արել Մեծ Բրիտանիայում մաչետների և զոմբի դանակների արգելք մտցնել
Մեծ Բրիտանիայում պետք է ամբողջությամբ արգելվեն մաչետներն ու զոմբի դանակները, հայտարարել է Լոնդոնի քաղաքապետ Սադիկ Խանը` կոչ անելով կառավարությանը արագացնել այդ զենքերի հասանելիությունը սահմանափակելու ծրագրերը, հաղորդում է PA Media-ն:
Անցյալ ամառ Մեծ Բրիտանիայի Ներքին գործերի նախարարությունը հայտարարեց, որ կշարունակի խստացնել այս տեսակի դանակների հետ կապված օրենսդրությունը:
Խանն ասել է, որ արգելքը պետք է արագ կիրառվի և վերացնի բոլոր մաչետներն ու զոմբի դանակները:
Ներկայում պլաններ կան օրենքից դուրս ճանաչել պրակտիկ կիրառություն չունեցող մաչետները և զոմբի դանակների որոշ տեսակներ, իսկ այդպիսի զենք ներմուծելու, արտադրելու, պահելու և վաճառելու համար առավելագույն պատիժը կավելացվի մինչև երկու տարի։
«Ես գրեթե ութ տարի քաղաքապետ եմ, և այժմ ութերորդ ներքին գործերի նախարարն ունեմ: 2016 թվականից մենք լսում ենք նրանց ծրագրերի մասին, որոնք դժվարացնում են զոմբի դանակներ և մաչետներ գնելը: Նրանք դա չեն արել: Դեռահասի համար վիճակախաղի տոմս գնելն ավելի դժվար է, քան առցանց մաչետե կամ զոմբի դանակ գնելը։ Մեր երկրում մաչետե ունենալու պատճառ չկա, մենք չունենք անտառներ, ինչպես Հարավային Ամերիկայում, և ոչ մի արդարացում կամ պատճառ չկա զոմբի դանակ ունենալու համար»,- ասել է Խանը։
Նախկինում դերասան Իդրիս Էլբան սկսել էր Don’t Stop Your Future արշավը՝ կոչ անելով անհապաղ արգելել այս դանակները:
Ի պատասխան՝ ներքին գործերի նախարարը կարագացնի դանակի մասին օրենքները խստացնելու ծրագրերը, հայտնում է Telegraph թերթը։
