Բացահայտվել են առողջ սնվելու մասին ամենատարածված սխալ պատկերացումները

Առողջ սնվելու համար պետք չէ հրաժարվել հացից, յուղոտ կաթնամթերքից և կարմիր մսից։ Դրանում համոզված են Հարվարդի համալսարանի սննդի պրոֆեսոր Դեյվիդ Լյուդվիգը և սննդաբան ու հոգեթերապևտ Ումա Նայդոն, ըստ shantnews-ի՝ գրում է The Sun-ը։

Ըստ Լյուդվիգի՝ առողջ սնվելու մասին ամենահայտնի առասպելը այն համոզմունքն է, որ պետք է սննդակարգից բացառել ճարպային կաթնամթերքը: Իրականում բարձր յուղայնությամբ կաթն ու մածունը, ըստ նրա, օգնում են պայքարել քաղցրավենիքի և վերամշակված սննդի հանդեպ հակումների դեմ, որոնք մեծագույն վնաս են հասցնում առողջությանը:

Լյուդվիգը հանուն գեղեցիկ և բարեկազմ մարմնի հացից հրաժարվելը համարում է մեկ այլ տարածված սխալ պատկերացում: Նրա կարծիքով, ամբողջական հացահատիկի ալյուրից ստացված մթերքներն առողջարար և անվտանգ սնունդ են։

Ումա Նայդոն ավելացրել է, որ կարմիր միսը նույնպես «վատ համբավ» ունի առողջ սնվելու կողմնակիցների շրջանում։ Նա համոզված է, որ տավարի միսը նույնքան առողջարար է, որքան ծովամթերքն ու թռչնամիսը։

Բացի այդ, Նայդոն կոչ է արել մարդկանց դադարել վախենալ ցանկացած վերամշակված սննդից։ Նա պարզաբանել է, որ վտանգ են ներկայացնում բարձր վերամշակման ենթարկված և քաղցկեղածին նյութեր պարունակող մթերքները, իսկ, օրինակ, պահածոյացված լոբիները, թեև վերամշակված սնունդ են, բայց մնում են անվտանգ։