Թուրքիան վերահաստատում է իր պատրաստակամությունը՝ աջակցելու դեպի ծով ելք չունեցող երկրներին
Թուրքիայի արտաքին գործերի նախարարության առաջին քարտուղար Հուսեյն Օզենի կարծիքով՝ Թուրքիան ՄԱԿ-ի անդամ հանդիսացող և դեպի ծով ելք չունեցող երկրների բազայի ամենամեծ դոնորն է, որի ծառայություններից կարող են օգտվել բոլոր ցանկացողները:
Ելույթ ունենով Երևանում կայացած դեպի ծով ելք չունեցող զարգացող երկրների նախարարական հանդիպման ժամանակ՝ Օզենը նշեց, որ Թուրքիան առաջնահերթ է համարում անընդհատ և անխոչընդոտ տրանսպորտային կապակցվածությունը, հետևաբար կողմ է բազմամոդալ տրանսպորտային ուղիների շահագործմանը։
«Նախարարական 22-րդ ժողովից հետո, որը տեղի ունեցավ ՄԱԿ-ի գլխավոր ասամբլեայի շրջանակում, հերթական այս հանդիպումը կարևոր դերակատարություն կունենա Կիգալիում հունիսին անցկացվելիք համաժողովի նախաշեմին: Այսօրվա հանդիպման թեման և հրամայականը ճիշտ ժամանակին են: Մենք պետք է ամրապնդենք արդար, մատչելի և ներառական տրանսպորտային կապակցվածությունը՝ որպես երկարաժամկետ, դիմակայուն տնտեսությունների շարժիչ ուժ: Աշխարհում կան մի քանի ճգնաժամեր, որոնք ազդում են մեր կյանքի տարբեր ուղղությունների վրա: Դեպի ծով ելք չունեցող երկրներն այդ պարագայում ավելի խոցելի են գլոբալ մարտահրավերների, սոցիալ-տնտեսական հետևանքների նկատմամբ: Մենք գիտակցում ենք, որ տրանսպորտային կապվածությունն առանցքային դեր ունի տնտեսական դաշտում, հատկապես նշված խմբի երկրների պարագայում: Կապակցվածության օգուտները չեն սահմանափակվում զուտ տնտեսական նկատառումներով: Դրանք կատալիզատոր են ընդհանրապես շարունակական զարգացման համար: Գտնվելով կարևոր տրանսպորտային միջանցքների խաչմերուկում՝ Թուրքիան առաջնահերթ է համարում անընդհատ և անխոչընդոտ կապակցվածությունը, հետևաբար կողմ է բազմամոդալ տրանսպորտային ուղիների շահագործմանը»,-նշեց Օզենը:
Նրա դիտարկմամբ՝ կապակցվածության ծրագրերն ավելի միասնական իրականացնելու համար թուրքական կողմը տրանսկասպիական արևելք-արևմուտք միջին միջանցքի նախաձեռնությունն է մշակել: Նրա բնորոշմամբ՝ միջին միջանցքը կարևոր նախաձեռնություն է, որում էական նշանակություն ունեն բազմամոդալ տրանսպորտային ուղիները, որոնք, անցնելով կովկասյան տարածաշրջանով, հատում են Կասպից ծովը և հասնում մինչև Կենտրոնական Ասիայի երկրներ ու Չինաստան:
«Այդ միջանցքն ընդգրկում է դեպի ծով ելք չունեցող մի շարք երկրներ՝ էապես նպաստելով նրանց կապակցվածությանը և ինտեգրման բարելավմանը: Այսօրվա գլոբալ հասարակությունում թվային կապակցվածությունը չի կարող մատնվել անուշադրության: Դա հարթակ է տնտեսական աճի և հասարակությունների վերափոխման համար: Տեխնոլոգիական առաջընթաց, որը թվային կապակցվածության բանալին է, օգնում է բարելավել արտահանման կառուցվածքը՝ ավելի մատչելի դարձնելով ֆինանսավորումը, սակայն տեխնոլոգիական առաջընթացի բերած օգուտները հավասարապես հասանելի չեն բոլոր երկրներին: Խոսքը վերաբերում է հատկապես դեպի ծով ելք չունեցող պետություններին և նվազ զարգացած երկրներին: Թուրքիան ՄԱԿ-ի անդամ հանդիսացող և դեպի ծով ելք չունեցող երկրների բազայի ամենամեծ դոնորն է, որի ծառայություններից կարող են օգտվել բոլոր ցանկացողները: Թուրքիան վերահաստատում է իր պատրաստակամությունը՝ աջակցելու նշված խմբի երկրներին՝ հանուն կայուն զարգացման և կապակցվածության բարելավման»,- եզրափակեց Թուրքիայի արտաքին գործերի նախարարության առաջին քարտուղարը:
