Դինքին սպանած ու վաղաժամ ազատված Օգյուն Սամաստն էլ մի «սաֆարով» է. թիկունքից կրակում են, ու եթե սպանվածը հայ է, դառնում են հերոս. Բագրատ Էստուկյան

Թուրքիայում լույս տեսնող հայկական «Ակոս» թերթի խմբագիր, հայազգի լրագրող, հրապարակախոս Հրանտ Դինքին դավադրաբար սպանած Օգյուն Սամաստը վաղաժամ ազատ է արձակվել բանտարկությունից:

Ավելի վաղ հաղորդվել էր, որ 16 տարվա բանտարկությունից հետո Սամաստին մի քանի ամիս վաղ են բաց թողել՝ «լավ պահվածքի» համար:

Այս տեղեկությունը 168.am-ի հետ զրույցում հաստատեց «Ակոս» թերթի հայկական բաժնի խմբագիր Բագրատ Էստուկյանը՝ հավելելով, որ Թուրքիան այսօր էլ չի փոխել բոլորին հայտնի իր դեմքը:

«Թուրքիայի բանտերում սոսկալի անարդարություն կա, ահագին ձախակողմյան գործիչներ, քուրդ գործիչներ, ընդդիմադիրներ, մտավորականներ շարունակում են բանտարկված մնալ: Նրանք նույնպես կարող էին օգտվել այս իրավունքից: Բայց միտումնավոր մերժվում են ազատ արձակվելու միջնորդությունները: Դրա փոխարեն՝ այս ոճրագործին ու իր նմաններին, շատ ավելի հեշտ պայմաններում, ժամկետից շուտ ազատ են արձակում»,- ասաց Բագրատ Էստուկյանը՝ հայտնելով, որ այս երևույթը Թուրքիայում քննադատվում է հատկապես ընդդիմադիր թևի կողմից:

Այս համատեքստում, ըստ Էստուկյանի, պարզապես հնարավոր չէ զուգահեռներ չտանել Ռամիլ Սաֆարովի ու Գուրգեն Մարգարյանի դեպքի հետ, երբ այդ անգամ արդեն ադրբեջանցի ոճրագործը քնած մարդուն կացնով սպանեց ու վերածվեց հերոսի:

«Այստեղ էլ Օգյուն Սամաստին հերոսի վերածելու քայլեր առաջին օրից են նկատվել: Տեսնում ենք, որ այդպիսի հոսանք կա նաև հիմա: Ժողովրդի մեջ ոճրագործին զորակցող, հերոսացնող ահագին տարրեր կան: Նա այդ կարգի «հերոս է»: Ճիշտ Ռամիլ Սաֆարովի նման: Գալիս են, գաղտագողի, թիկունքից կրակում են, և, եթե սպանվածը հայ է, ուրեմն դու էլ «հերոս» ես: Նշանակություն չունի, թե ինչ ցածր քայլ ես կատարել»,- համոզմունք հայտնեց Բագրատ Էստուկյանը՝ արձանագրելով, որ ժողովուրդների համերաշխության մասին Հրանտ Դինքի խոսքերը համոզիչ են եղել Թուրքիայի բնակիչների մի հատվածի համար միայն, բայց ո՛չ բոլորի:

Հիշեցնենք, որ Հրանտ Դինքը սպանվել էր 2007 թվականի հունվարի 19-ին՝ այդ ժամանակ՝ 17-ամյա, ազգությամբ թուրք Օգյուն Սամաստի կրակոցից: Մարդասպանը երեք կրակոց էր արձակել Դինքի թիկունքից՝ հենց «Ակոս»-ի խմբագրության դիմաց: Այդ դեպքից հետո Թուրքիայի գրեթե ամբողջ տարածքում բազմահազարանոց ցույցեր մեկնարկեցին՝ «բոլորս հայ ենք, բոլորս Դինք ենք» գրություններով:

«Իրենք էլ չէին կանխատեսում, որ այդքան մեծ աղմուկ կբարձրանար Հրանտի սպանությունից հետո, բայց այդ աղմուկը բարձրացավ: Այստեղ դեր խաղաց Հրանտի անհատականությունը, հեղինակությունը: Որովհետև, ինչպես ասացիք, նա միշտ խոսում էր խաղաղության, համերաշխության, հաշտության, միմյանց հասկանալու, միմյանց ցավերն ու ուրախությունները կիսելու մասին»,- ասաց Էստուկյանը՝ հավելելով, որ լինելով ազգամետ մտավորական՝ Հրանտ Դինքը միշտ էլ գիտակցել է Թուրքիայում մնալու բոլոր վտանգները: Այդ իրավիճակը փոխելու համար էլ հենց չէր հեռանում: Նրա պայքարը, ըստ մեր զրուցակցի, անձնական չէր, այլ համամարդկային:

Բագրատ Էստուկյանը մատնանշեց ևս մի ակնառու վտանգ:

Ըստ նրա՝ ոճրագործներին ժամկետից վաղ ազատ արձակելու թուրքական պրակտիկան ակնհայտ ցուցադրում է այդ երկրի իրավաքաղաքական համակարգի անարդարություններն ու սպառնում հանցագործությունների ծավալների մեծացում:

«Ինքը հասարակության մեջ կարող է ընկալվել՝ որպես կերպար, որը մարդասպանություն, ոճրագործություն գործելով՝ կարող է անգամ վաղաժամ ազատվել բանտից: Իսկ դա բավականին մեծ ռիսկեր է պարունակում, որ դրանք հետագայում կարող են կրկնվել»,- համոզմունք հայտնեց Թուրքիայում լույս տեսնող հայկական «Ակոս» օրաթերթի հայկական բաժնի խմբագիր Բագրատ Էստուկյանը:

Նազելի Ստեփանյան