ՀՀ-ն տարածքներ նվաճելու մտադրություն չունի. Նիկոլ Փաշինյան
ԱԺ մշտական հանձնաժողովների համատեղ նիստում «ՀՀ 2022 թվականի պետական բյուջեի մասին» օրենքի նախագիծը ներկայացնելիս վարչապետ Նիկոլ Փաշինյանը նշեց՝ «2022 թվականի պետական բյուջեն հիմնված է 3 առաջնահերթությունների վրա՝ անվտանգության համակարգի բարեփոխում և բարելավում, ենթակառուցվածքների զարգացում, կրթության և գիտության արդիականացում: Գործադիրի ղեկավարը նաև մանրամասնեց հիշատակած կետերից յուրաքանչյուրի ուղղությամբ կատարվող քայլերը:
«2022թ.-ի պաշտպանական բյուջեն 2021թ.-ի պլանի համեմատ ավելի է 11 տոկոսով՝ կազմելով ավելի քան 345 մլրդ դրամ: Մենք հետևողականորեն շարժվելու ենք ՀՀ-ում պրոֆեսիոնալ բանակ ստեղծելու ճանապարհով, բայց դա անելու ենք սահուն, մտածված քայլերով՝ քայլ առ քայլ մեծացնելով զինվորական ծառայության գրավչությունը, բարելավելով սպայի և սպայական ծառայության կերպարը, զարգացնելով ու բարելավելով ՀՀ պաշտպանական դոկտրինը»,- ասաց Նիկոլ Փաշինյանը՝ շեշտելով, որ անվտանգային նոր միջավայրում երկրի սահմանների պահպանությունը շարունակում է մնալ կարևորագույն առաջնահերթություն.
«Խնդիր ենք դրել ամեն տարվա հետ սահմանների պահպանության գործառույթն ավելի ու ավելի շատ իրականացնել սահմանապահ զորքերի միջոցով՝ հեռանկարում ունենալով մեր սահմաններին միայն սահմանապահ զորքերի ծառայություն իրականացնելու տեսլականը»:
Նա հավելեց՝ ՀՀ տարածքից, մասնավորապես՝ Սոթք-Խոզնավար հատվածից ադրբեջանական զինված ուժերի ստորաբաժանումների դուրսբերման և ՀՀ-ի ու Ադրբեջանի սահմանների դելիմիտացիայի և դեմարկացիայի գործընթացի մեկնարկը բարենպաստ պայմաններ կստեղծի այս խնդրի լուծման համար, ապա շեշտեց.
«Ինչ վերաբերում է մեր երկրի պաշտպանական ռազմավարությանը՝ կառավարության ծրագրում արդեն ընդգծել ենք, որ ՀՀ-ն, ինչպես ցանկացած խաղաղասեր պետություն, զինված ուժերը զարգացնելու և վերափոխելու է ոչ թե ագրեսիայի, այլ ագրեսիայից պաշտպանվելու համար. ՀՀ-ն տարածքներ նվաճելու մտադրություն չունի»:
Վարչապետը անվտանգության համակարգի զարգացման իմաստով կարևորեց ոչ միայն բանակի պաշտպանական կարողությունների արդիականացումը, այլև ՀՀ-ի շուրջ բարենպաստ արտաքին միջավայրի ձևավորումը, ՀՀ-ի, Արցախի և տարածաշրջանի համար խաղաղ զարգացման դարաշրջան բացելու օրակարգի հետևողական իրագործումը, որը, ըստ նրա, տեսանելի է մեր տարածաշրջանում թշնամանքի մթնոլորտի հաղթահարման, ԼՂ հակամարտության կարգավորման նպատակով ԵԱՀԿ Մինսկի խմբի համանախագահության ձևաչափով բանակցային գործընթացի վերականգնման, տարածաշրջանային տնտեսական և տրանսպորտային ենթակառուցվածքների ապաշրջափակման միջոցով:
Նիկոլ Փաշինյանը համոզված է՝ ապաշրջափակումը որակապես կարող է փոխել ՀՀ տնտեսության բովանդակությունը և կառուցվածքը, լրացուցիչ խթան դառնալ ներհայաստանյան ենթակառուցվածքների զարգացման համար, ապահովել երկարաժամկետ ներառական տնտեսական աճ՝ ՀՀ քաղաքացիների համար ստեղծելով հավասար պայմաններ տնտեսական գործունեության մեջ ներգրավելու համար, էականորեն բարձրացնել տնտեսության գրավչությունը տեղական և օտարերկրյա ներդրումների համար:
«Տարածաշրջանային ենթակառուցվածքային զարգացումներին զուգահեռ՝ մենք հայաստանյան ենթակառուցվածնքերի զարգացման ուղղությամբ 2022 թ.-ին ծախսելու ենք 32 տոկոսով ավել, քան 2021 թվականին՝ հասցնելով այս ուղղությամբ կատարվելիք ծախսերը ավելի քան 278 միլիարդ դրամի:
Նախատեսված է վերականգնել և նորոգել 500 կմ ճանապարհ, նախագծել և կամ կառուցել տարբեր մեծությամբ ջրամբարներ, որոնք պետք է էապես բարձրացնեն ոռոգման ջրի մատակարարման ծավալը և որակը, 35 տոկոսով աճելու է խմելու ջրի որակի բարելավման ուղղությամբ կատարվող աշխատանքների ծավալը՝ հասնելով 11.5 միլիարդ դրամի, մեկնարկելու է Հյուսիս-Հարավ մայրուղու Սիսիան-Քաջարան և Քաջարան-Ագարակ հատվածների մրցույթները՝ նպատակ ունենալով հաջորդ տարի արդեն սկսել միանգամից երկու հատվածների շինարարական աշխատանքները:
Մեր պետության հարատևությունն ապահովելու համար անհրաժեշտ են երկարաժամկետ ներդրումներ գիտության և կրթության բնագավառում, ինչը մեզ համար չափազանց կարևոր առաջնահերթություն է: 2022 թվականին ԿԳՄՍ նախարարությանը հատկացվող գումարն աճելու է 27 տոկոսով»,- նախագծից մեջբերումներ կատարելով՝ ասաց Նիկոլ Փաշինյանը:
Մանրամասները՝ տեսանյութում
