Կորոնովիրուսի դեմ պայքարին նվիրված՝ իսպաներենով լույս է տեսել տարեգիրք. ընդգրկված է նաև Արցախը
Աշխարհի երեսուն երկրի արդի գրողների մասնակցությամբ իսպաներենով լույս է տեսել «Մենք կղզի չենք» վերնագրով տարեգիրք՝ նվիրված կորոնովիրուսի դեմ պայքարին։
Այս մասին «Արցախպրես»-ի թղթակցի հաղորդմամբ՝ Իսպանիայից այս մասին հայտնել է արցախցի բանաստեղծ Սլավի-Ավիկ Հարությունյանը։
Նրա խոսքով՝ տարեգիրքն ունի «Բոլորս իրար կարիքն ունենք» կարգախոսը:
Գրքում տեղ են գտել աշխարհի մի քանի տասնյակ երկրների՝ 21-րդ դարի ժամանակակից հայտնի գրողների ստեղծագործությունները՝ ինչպես արձակ, այնպես էլ՝ պոեզիա։ Մասնավորապես՝ գրողներ Իսպանիայից, Արգենտինայից, Մեքսիկայից, Գվինեայից, Վենեսուելայից, Ռուսաստանից եւ այլ երկրներից։ Մեր տարածաշրջանից անթոլոգիայում ընդգրկված է միայն Արցախը։
Պոեզիայի բաժինը բացվում է մեր համերկրացի բանաստեղծ Սլավի-Ավիկ Հարությունյանի բանաստեղծական շարքով, որը հայերենից իսպաներեն է թարգմանել Նարինե Այվազյանը։ Գրքի կազմողն ու խմբագիրը մեքսիկացի Սամուել Պառռան (Samuel Parra) է։ Անթոլոգիային արդեն հասցրել են անդրադառնալ մի շարք թերթեր ու կայքեր։
«Մասնավորապես «Noroeste» թերթը գրում է, որ Կորոնովիրուսի «Covid 19»-ի դեմ գրական այս ծրագիրը, որը մեկնարկեց երկուշաբթի, արդեն հասանելի է նաև սոցիալական բոլոր ցանցերում թվայնացված տարբերակով։
Տարեգրքում ընդգրկված են բոլոր ժանրերը, ինչպիսիք են պատմվածք, պոեզիա, էսսեներ։ Գրքում ներկայացված են ավելի քան 30 հեղինակներ, ովքեր ըննդեմ համաճարակի իրենց կարգախոսն են բերել. «Ոչ ոք միայնակ չէ»։ Այո՛, ոչ ոք միայնակ չէ։ Աշխարհի բոլոր մարդիկ երկրագնդի բոլոր մասերում միասնական են պայքարում ընդհանուր աղետի դեմ»,-հայտնել է Սլավի-Ավիկ Հարությունյանը։
