Գյուղացիները պետք է պայքարեն իրենց իրավունքների համար, պահանջեն կրած վնասների փոխհատուցում ու այլընտրանքի ստեղծում
Լոռու մարզի Շնող և Թեղուտ գյուղերի բնակիչները քիչ առաջ բացել են դեպի «Թեղուտ» ՓԲԸ-ը տանող ճանապարհը, որը փակել էին առավոտյան ժամը 05:00-ից:
Բնակիչները պահանջում էին, որ ընկերությունն առաջին հերթին իրենց ընդունի աշխատանքի:
Նշված վայր է ժամանել Շնող-Քարկոպ-Թեղուտ խոշորացված համայնքի ղեկավար Դավիթ Ղումաշյանը, ով գյուղացիներին վստահեցրել է, որ մինչև երկուշաբթի ընկերության ղեկավարության հետ կքննարկի բարձրացված հարցը և այդ օրը հստակ պատասխան կտա:
Բնակիչների խոսքով՝ ընկերությունն արդեն ավարտել է աշխատանքի ընդունման գործընթացը և չի կարող աշխատանքի ընդունել Շնողի և Թեղուտի բնակիչներին: Աշխատողները հիմնականում Ալավերդիից են, որտեղ, ինչպես հայտնի է՝ վարչապետ Նիկոլ Փաշինյանի գլխավորած հեղափոխությունից հետո փակվել է Ալավերդու պղնձաձուլական գործարանը:
Այնինչ, Շնող խոշորացված համայնքի բնակիչների հետ հանդիպման ժամանակ «Թեղուտ» ՓԲԸ-ի նոր ղեկավարները խոստացել են աշխատատեղերի կեսից ավելին հատկացնել Շնողի բնակիչներին, սակայն իրենց խոստումը չեն պահել:
«Համայնքային համախմբման և աջակցության կենտրոն» հ/կ ղեկավար Օլեգ Դուլգարյանի փոխանցմամբ՝ գյուղացիների պահանջն այն է, որ իրենց աշխատանքով ապահովեն:
«Ընկերությունը նախկինում ինչ-որ խոստումներ է տվել, հիմա դրա պահանջն են առաջ քաշում: Միևնույն ժամանակ, որքան ինձ հայտնի է, ընկերությունն ուշադրություն է դարձնում նեղ մասնագիտական կարողություններին, քանզի որպես այդպիսին՝ ուղղակի բանվորի աշխատանք գրեթե չկա, ավտոմատացված է: Բացի այդ՝ ընկերությունն ըստ էության չի աշխատում արտադրանք տալու առումով, ինչը նշանակում է, որ հիմա ամբողջ ծավալով չի կարող աշխատանքի ընդունելություն կատարել»,- 168.am-ի հետ զրույցում ասաց Օլեգ Դուլգարյանը:
«Համայնքային համախմբման և աջակցության կենտրոն» հ/կ ղեկավարի հաղորդմամբ՝ հանքարդյունաբերության և գետերի, ջրերի աղտոտման պատճառով հողը դեգրադացվել է:
«Ապրում են խեղաթյուրված և մահացող գյուղատնտեսության պայմաններում: Այդ պայմաններում առավել քան երբևէ պետք է գյուղացիները պայքարեն իրենց իրավունքների համար, խոսքը սոսկ աշխատատեղերը չեն, այլ այլընտրանքի ստեղծումն իրենց համար և կրած վնասների փոխհատուցումը»,- հավելեց նա:
Հիշեցնենք, որ մայիսի 28-ին, Ապարանում լրագրողների հետ զրույցում ՀՀ Էկոնոմիկայի նախարար Տիգրան Խաչատրյանն ասել էր, որ Թեղուտի հանքը շուտով պատրաստ կլինի վերագործարկման: Նրա խոսքով՝ Թեղուտը, ինչպես Հայաստանի մյուս լեռնահանքային ձեռնարկությունները, ընդերքից պղնձի հանքաքար արդյունահանելով՝ արտադրում է խտանյութ, այն ունեցել է ժամանակավոր դադար, իսկ հիմա, տնօրինության հավաստիացմամբ. նախապատրաստական աշխատանքներ են իրականացվում:
Նշենք, որ այժմ Թեղուտի հանքավայրը ռուսաստանյան «ՎՏԲ-Հայաստան» բանկի հսկողության տակ է: Բանկի ղեկավարությունը նոր օպերատոր է ներգրավել հանքավայրը շահագործելու նպատակով: Խոսքը ռուսաստանաբնակ, ազգությամբ հայ գործարար Նորիկ Պետրոսյանի մասին է, որը, ըստ որոշ տեղեկությունների, Ռուսաստանում ևս հանքարդյունաբերությամբ է զբաղվում:
Անի Կարապետյան
