Bloomberg․ ԱՄՆ-ը Թայվանի մոտ գտնվող կղզում կտեղակայի հականավային համալիր
ԱՄՆ-ը ծրագրում է Ճապոնիայի հետ խոշոր համատեղ զորավարժությունների շրջանակում Թայվանից 110 կիլոմետր հեռավորության վրա գտնվող կղզում տեղակայել NMESIS հականավային հրթիռային համալիր, հաղորդել է Bloomberg գործակալությունը՝ հղում կատարելով իրազեկ աղբյուրին։
Գործակալության տվյալներով՝ հրթիռային համալիրը «Սրված սուր» զորավարժությունների ընթացքում կտեղափոխեն ճապոնական Յոնագունի կղզի, որոնք կանցկացվեն հոկտեմբերի 19-29-ը։ Նշվել է, որ ճապոնական զինվորականները նույնպես կարող են այնտեղ տեղակայել իրենց սեփական հականավային և զենիթահրթիռային համալիրները, ինչպես նաև ռադիոէլեկտրոնային պայքարի միջոցներ։
Ինչպես նշել է գործակալությունը, NMESIS գործողության շառավիղը կազմում է մոտ 185 կիլոմետր, ինչը թույլ է տալիս խոցել նավեր Թայվանի շրջանում։ Անցյալ տարի ամերիկացի զինվորականներն արդեն կղզում անցկացրել էին մատակարարումների տեղափոխման զորավարժություններ՝ նմանակելով առաջավոր բազայի ստեղծումը տարածաշրջանային ճգնաժամի դեպքում։
«Սրված սուր» զորավարժությունն անցկացվում է երկու տարին մեկ և ԱՄՆ և Ճապոնիայի ամենախոշոր համատեղ զորավարժություններից մեկն է։ Ավելի վաղ Չինաստանի ԱԳՆ ներկայացուցիչը հայտնել էր, որ 2030 թվականից Յոնագունիում մշտապես զենիթային հրթիռներ տեղակայելու Ճապոնիայի ծրագրերը կուժեղացնեն տարածաշրջանային լարվածությունը և ռազմական առճակատում կսադրեն։
