Պակիստանը ԵԱՏՄ-ի հետ ազատ առևտրի գոտու մասին համաձայնագիր կկնքի. ՌԴ-ում դեսպան
Իսլամաբադը Եվրասիական տնտեսական միության (ԵԱՏՄ) հետ ազատ առևտրի գոտու մասին համաձայնագիր կկնքի։ Այս մասին ՏԱՍՍ-ին տված հարցազրույցում հայտարարել է Մոսկվայում Պակիստանի դեսպան Ֆայսալ Նիյազ Տիրմիզին։
Նա նշել է, որ գործընթացը կարող է տևել մի քանի ամսից մինչև երկու տարի:
«Մենք արդեն գործարկել ենք Եվրասիական տնտեսական միության հետ ազատ առևտրի գոտու ստեղծման գործընթացը, քանի որ Պակիստանը «Հյուսիս-հարավ» տրանսպորտային միջանցքի բնական գործընկերն է։ Ես տեսնում եմ այն օրը, երբ մարդիկ Մուրմանսկից, Մինսկից, Մոսկվայից կկարողանան մեկնել Իսլամաբադ, Կարաչի կամ Գվադար այս բոլոր երկրների միջով (Հյուսիս-Հարավ միջանցքի)։ Պակիստանը խորապես համոզված է, որ լինելով Եվրասիական տնտեսական տարածաշրջանի երկիր՝ պետք է ավելի շատ առևտրային շփումներ ունենա մարդկանց միջև, ինչպես նաև գործարար երկկողմ շփումներ՝ միավորման բոլոր երկրների հետ», – ասել է նա։
Շփումներն ընթացել են բավական բարձր մակարդակով՝ Պակիստանի առևտրի նախարարի և Եվրասիական տնտեսական միության ղեկավարի միջև։
Եվրասիական տնտեսական միությունը ստեղծվել է 12 տարի առաջ։ Միավորման անդամներն են Ռուսաստանը, Հայաստանը, Բելառուսը, Ղազախստանը և Ղրղզստանը։ Ստեղծումից ի վեր ԵԱՏՄ անդամ պետությունների ընդհանուր ՀՆԱ-ն 1.6 տրիլիոն դոլարից աճել է մինչև 3.01 տրիլիոն դոլար, անդամ պետությունների միջև փոխադարձ առևտրի ծավալը կրկնապատկվել է, իսկ երրորդ երկրների հետ առևտրաշրջանառությունն աճել է 72%-ով։ Մինչև 2025 թվականի ավարտը միության ՀՆԱ-ն, կանխատեսումների համաձայն, կաճի 1.7%-ով։
