Սանկտ Պետերբուրգում միգրանտներին կարող են արգելել աշխատել առևտրի ոլորտում
Սանկտ Պետերբուրգի իրավապահ մարմինները խնդրում են իշխանություններին արգելել միգրանտների աշխատանքը մանրածախ և մեծածախ առևտրի ցանցերի օբյեկտներում։ Այս մասին Օրենսդիր ժողովում իր ելույթի ժամանակ հայտնել է Պետերբուրգի և Լենինգրադի մարզի ՆԳՆ գլխավոր վարչության պետ Ռոման Պլուգինը։ Այս նախաձեռնությամբ հանդես են եկել «Պերեկրեստոկ» խանութի այցելուի մահվանից հետո, որի սպանության մեջ մեղադրվել են առևտրի կետի անվտանգության աշխատակիցները։
Տեղի ունեցած միջադեպի հետևանքների վերաբերյալ հարցն ուղղել է «Ռուսաստանի Լիբերալ-դեմոկրատական կուսակցության» պատգամավոր Պավել Իտկինը, փոխանցում է «ՌԲԿ»-ն: Նա նշել է, որ խմբակցությունը օտարերկրյա քաղաքացիներին արգելում է կատարել ցանկացած գործունեություն, որը կապված է մարդկանց բերման ենթարկելու կամ ուժի կիրառման հետ (անկախ զբաղեցրած պաշտոնից)։
Ի պատասխան՝ Ռոման Պլուգինը հայտարարել է, որ իրավիճակը համարում է «բարձրագույն աստիճանի սրիկայական»։ ՆԳՆ տարածքային գլխավոր վարչության պետն առաջարկել է արգելել միգրանտների ներգրավումը առևտրի ոլորտում ցանկացած պաշտոնի համար։ Նա նշել է, որ ներկայումս գործում է օտարերկրյա քաղաքացիներին որպես անվտանգության աշխատակից, ինչպես նաև մեծածախ և մանրածախ ցանցերում գնորդների սպասարկման հետ կապված այլ պաշտոնական հաստիքներում աշխատանքի ընդունելու արգելքը։
«Սակայն բիզնեսը «քողարկում» է միգրանտներին պահեստապետների, առաքիչների և նմանատիպ այլ հաստիքների տակ։ Այդ իսկ պատճառով մենք ցանկանում ենք միջնորդություն ներկայացնել՝ մանրածախ և մեծածախ առևտրի օբյեկտներում միգրանտներին աշխատանքի ընդունումը կանխելու համար։ Մենք ուսումնասիրել ենք, որ տնտեսության համար դա հարված չի լինի», – հայտարարել է Ռոման Պլուգինը։
