Իրանը և ԱԷՄԳ-ն բանակցությունների նոր փուլ են պլանավորում
Իրանի արտաքին գործերի նախարարության և Ատոմային էներգիայի միջազգային գործակալության (ԱԷՄԳ) ներկայացուցիչները բանակցությունների հերթական փուլը կանցկացնեն համագործակցության վերսկսման հարցի շուրջ:
Այս մասին հայտարարել է Իսլամական Հանրապետության ատոմային էներգիայի կազմակերպության ղեկավար Մոհամմադ Էսլամին՝ հավելելով, որ գործակալության հետ աշխատանքի հիմնական խոչընդոտը մնում է ԱԷՄԳ-ի գլխավոր տնօրեն Ռաֆայել Գրոսին:
«Այս պահին երկու հանդիպում է տեղի ունեցել ԱԳ նախարարության և գործակալության ներկայացուցիչների միջև, նաև պլանավորվել է երրորդ հանդիպումը։ Մեր գլխավոր պահանջը գործակալությունից այն է, որ դրա կառավարման համակարգը գտնվում է գերիշխանական կարգի ազդեցության տակ, և գլխավոր խնդիրը գլխավոր տնօրենի անձն է», – նրա խոսքը մեջբերում է IRNA գործակալությունը:
Էսլամին նաև հայտնել է, որ Թեհրանը, չնայած Իսլամական Հանրապետության միջուկային օբյեկտներում ԱԷՄԳ-ի տեսչական ստուգումների անցկացման արգելքին, թույլ է տվել երկիր ժամանել երկու տեսուչների՝ ռուսաստանցի մասնագետների կողմից կառուցված Բուշերի ատոմակայանում միջուկային վառելիքի փոխարինման գործընթացը վերահսկելու համար: Լույս հունիսի 13-ի գիշերը Իսրայելը ռազմական գործողություն սկսեց Իրանի դեմ։
Իսլամական Հանրապետությունը պատասխան գրոհ իրականացրեց։ ԱՄՆ-ն հունիսի 22-ին մտավ հակամարտության մեջ՝ հարվածելով Սպահանում, Նաթանզում և Ֆորդոյում գտնվող իրանական միջուկային օբյեկտներին։ Հաջորդ օրը Իրանը Կատարում գրոհեց Մերձավոր Արևելքում խոշորագույն Ալ Ուդեյդ ամերիկյան ավիաբազայի վրա։ Դրանից հետո ԱՄՆ նախագահ Դոնալդ Թրամփը հայտարարեց, որ Իսրայելը և Իրանը համաձայնել են հրադադարի ռեժիմ հաստատել։ Այն ուժի մեջ մտավ հունիսի 24-ին։
Իրանը քննադատել է այն, որ ԱԷՄԳ-ն չի դատապարտել իր միջուկային օբյեկտներին հասցված հարվածները։ Հուլիսի 2-ին Իրանի նախագահ Մասուդ Փեզեշքիանն օրենք է ստորագրել ԱԷՄԳ-ի հետ համագործակցությունը և միջուկային օբյեկտներում բոլոր տեսչական ստուգումները դադարեցնելու մասին։
