Մահացել է ռուսական մշակույթի խորհրդանիշը
Խորհրդային և ռուս կոմպոզիտոր Ռոդիոն Շչեդրինը մահացել է 93 տարեկան հասակում, հաղորդում է Մեծ թատրոնի (Большой театр) Տելեգրամ-ալիքը։
«Օգոստոսի 28-ի երեկոյան, 93 տարեկան հասակում, կյանքից հեռացավ մեր ժամանակների մեծագույն հանճարը՝ համաշխարհային դասական Ռոդիոն Կոնստանտինովիչ Շչեդրինը»,- ասվում է գրառման մեջ։
Ինչպես РИА Новости-ին հայտնել է աղբյուրը, կոմպոզիտորը մահացել է Գերմանիայի հիվանդանոցներից մեկում։
Շչեդրինը ծնվել է 1932 թվականի դեկտեմբերի 16-ին Մոսկվայում: 1941 թվականին նա ընդունվել է Մոսկվայի կոնսերվատորիային կից Կենտրոնական երաժշտական դպրոց: Հայրենական մեծ պատերազմի սկսվելուն պես նրա ընտանիքը տարհանվել է Կույբիշև: Մայրաքաղաք վերադառնալուց հետո նա շարունակել է ուսումը Մոսկվայի երգչախմբային դպրոցում, որն ավարտել է 1950 թվականին: 1959 թվականին նա ավարտել է Պ. Ի. Չայկովսկու անվան Մոսկվայի կոնսերվատորիայի ասպիրանտուրան:
Շչեդրինի ամենահայտնի ստեղծագործություններից են Առաջին սիմֆոնիան (1958), «Կուզիկ ձիուկը» բալետը (1960), «Կարմեն սյուիտ» բալետը (1967), «Ոչ միայն սեր» օպերան (1961), «Озорные частушки» նվագախմբի համար համերգների շարքը (1963):
Շչեդրինը ԽՍՀՄ ժողովրդական արտիստ է (1981), Լենինյան մրցանակի դափնեկիր (1984): Նա պարգևատրվել է Պատվո շքանշանով (2017):
1958 թվականից կոմպոզիտորը ամուսնացած էր բալետի պարուհի Մայա Պլիսեցկայայի հետ (1925-2015):
Ամերիկյան «Նյու Յորք Թայմս» թերթը խորհրդային և ռուս ականավոր կոմպոզիտոր Ռոդիոն Շչեդրինին անվանել է 20-րդ դարի երկրորդ կեսի ռուսական մշակույթի խորհրդանիշ։
Հրապարակելով կոմպոզիտորի մահվան մասին լուրը՝ թերթը գրում է. «Մահացել է ռուս ականավոր կոմպոզիտոր Ռոդիոն Շչեդրինը, որի ստեղծագործությունների ընդարձակ ցանկը ներառում է օպերաներ, բալետներ, կոնցերտներ և սիմֆոնիաներ: Նա և իր կինը՝ մեծ բալետի պարուհի Մայա Պլիսեցկայան, 20-րդ դարի երկրորդ կեսի ռռուսական մշակույթի խորհրդանիշներն էին»:
