Մեկ դար անց Փարիզի Սեն գետը կրկին բաց է հանրային լողի համար
Փարիզի Սեն գետը 1923 թվականից ի վեր առաջին անգամ վերաբացվել է հանրային լողի համար։
Սենի մաքրման համար վերջին տարիներին գործադրվել են մեծածավալ ջանքեր։
Մասնավորապես, անցյալ տարի գետի ջրի որակի բարելավման նպատակով ներդրվել է ավելի քան 1.4 միլիարդ եվրո։ Սա իրականացվել է դեռևս 1988 թվականին նախագահ Ժակ Շիրակի տված խոստման իրագործման շրջանակում՝ գետում լողը հնարավոր դարձնելու համար։Հուլիսի 5-ի առավոտյան՝ տեղական ժամանակով ժամը 08:00-ին, մի քանի տասնյակ մարդ առաջինը ցատկել է Սեն, նշանավորելով այս խորհրդանշական իրադարձության մեկնարկը։
Հանրային լողի համար գծանշվել են երեք հիմնական տարածքներ՝ Էյֆելյան աշտարակի մոտ, Սուրբ Աստվածամոր տաճարի հարևանությամբ և քաղաքի արևելյան հատվածում։ Տարածքներում տեղադրվել են հանդերձարաններ, ցնցուղներ, փրկարարական հսկողություն, և թույլատրվում է միաժամանակ մինչև 300 մարդու այցելություն։
Մինչև օգոստոսի վերջը լողավազանները որոշակի ժամերի անվճար հասանելի կլինեն 10 կամ 14 տարեկանից բարձր անձանց համար՝ կախված տարածքից։ Տարածքներում մշտական հերթապահություն կիրականացնեն փրկարարական ծառայությունները։
Սենում լողն արգելվել էր 1923 թվականին՝ նավահանգստային շարժի ակտիվության և գետի ջրի որակի կտրուկ վատթարացման պատճառով։ Ջրահեռացման հնացած ենթակառուցվածքը չէր կարողանում սպասարկել բնակչության աճող հոսքը, և ուժեղ տեղումների ժամանակ աղտաջրերը ուղիղ թափվում էին գետ։
Վերջին 20 տարվա ընթացքում իրականացված բարելավումները զգալիորեն նվազեցրել են աղտոտման մակարդակը։ Սակայն անգամ անցյալ ամառ՝ Օլիմպիական խաղերից առաջ, Սենը դեռևս չէր բավարարում բոլոր ջրի որակի ստանդարտներին։
Կազմակերպիչները նշում են, որ կեղտաջրերի թափման դեպքերը պայմանավորված էին ուժեղ տեղումներով։
Խաղերի նախապատրաստման ընթացքում, ի պատասխան անվտանգության վերաբերյալ մտահոգություններին, Փարիզի քաղաքապետ Անն Իդալգոն և Օլիմպիական կոմիտեի անդամները անձամբ լողացել են Սենում՝ ընդգծելով, որ այն անվտանգ է օգտագործման համար։
