Իրանը խիստ քննադատել է ՄԱԳԱՏԷ-ի վերջին զեկույցը՝ այն քաղաքականացված անվանելով
Իրանի արտաքին գործերի նախարարի իրավական և միջազգային հարցերով տեղակալ Քազեմ Ղարիբաբադին Ատոմային էներգիայի միջազգային գործակալության (ՄԱԳԱՏԷ) վերջին զեկույցը «քաղաքական» և «շինծու տեղեկատվության» վրա հիմնված է անվանել, հայտնում է Mehr-ը։
Ըստ նրա, զեկույցում, փոխանակ ընդգծելու Իրանի լայնածավալ համագործակցությունը Գործակալության հետ, հիմնական ուշադրությունը դարձվում է ավելի քան քսան տարվա վաղեմության մեղադրանքներին՝ հարցեր, որոնք արդեն փակված են։
Ըստ Ղարիբաբադիի, ՄԱԳԱՏԷ-ն ընդունել է Իրանի ընթացիկ միջուկային գործունեության մեջ շեղումների ապացույցների բացակայությունը։ Սակայն, որոշ երկրների ճնշման տակ, որոնք ձգտում են քաղաքական լծակներ կիրառել, Գործակալությունը որոշել է վերակենդանացնել անցյալի պնդումները։
Նա նաև քննադատել է ՄԱԳԱՏԷ-ին Իրանի լայնածավալ համագործակցությունը և անցկացվող համապարփակ տեսչությունները անտեսելու համար, հայտարարելով, որ Իրանի ողջ միջուկային գործունեությունը խաղաղ բնույթ է կրում և իրականացվում է լիակատար միջազգային վերահսկողության ներքո։
Ավելի վաղ ՄԱԳԱՏԷ-ն զեկույց էր հրապարակել, որում ասվում էր, որ Իրանն էլ ավելի է մեծացրել գրեթե մինչև զենքի մակարդակի հարստացված ուրանի իր պաշարները։
Ըստ ՄԱԳԱՏԷ-ի զեկույցի, մայիսի 17-ի դրությամբ Իրանը կուտակել է 408,6 կիլոգրամ մինչև 60% հարստացված ուրան։
Սա 133,8 կիլոգրամով ավելի է, քան փետրվարին հրապարակված ՄԱԳԱՏԷ-ի նախորդ զեկույցում, կամ գրեթե 50%-ով։
Այս նյութը փոքր տեխնիկական քայլ է առաջ՝ 90%-անոց զենքի որակի մակարդակի համեմատ։ Փետրվարյան զեկույցում ասվում էր, որ պաշարները կազմում են 274,8 կիլոգրամ։
