Գազայում իսրայելական հարվածներից մեկ օրում զոհվել է ավելի քան 60 մարդ
Իսրայելի պաշտպանության ուժերի կողմից Գազայի հատվածին հասցված հարվածների հետևանքով մեկ օրում զոհվել է առնվազն 63 պաղեստինցի, տասնյակ մարդիկ վիրավորվել են։ «Արմենպրես»-ի փոխանցմամբ՝ այս մասին հայտնում է Al Jazeera-ն։
Վերջին 24 ժամվա ընթացքում անկլավի մի քանի շրջաններ, այդ թվում՝ Գազայի հատվածի կենտրոնական մասում գտնվող Նուսեյրաթի և Աշ-Շուջաիայի փախստականների ճամբարները, ինչպես նաև հարավում գտնվող Խան Յունիս և Ռաֆահ քաղաքները ենթարկվել են զանգվածային ռմբակոծության։
Եվրամիությունը կոչ է արել Իսրայելին վերացնել Գազայի հատվածի շրջափակումը՝ մարդասիրական օգնության տրամադրումը թույլատրելու համար։
«Եվրամիությունը մտահոգված է Գազայի դեմ պատերազմի ընդլայնմամբ, որը կարող է հանգեցնել ավելի շատ կյանքերի կորստի և Պաղեստինի ժողովրդի տառապանքների», – մամուլի ասուլիսում հայտարարել է Եվրահանձնաժողովի խոսնակ Անուար ալ-Անոնին՝ կոչ անելով Իսրայելին չեղարկել Գազայի հատվածում ռազմական գործողություններն ընդլայնելու իր ծրագիրը։
Տեղեկություններ կան այն մասին, որ Արևմտյան ափին իսրայելական բանակը սկսել է իրականացնել Թուլկարմի և Նուր Շամսի փախստականների ճամբարներում ավելի քան 100 բնակելի շենքերի քանդման ծրագիրը։
Իսրայելը շարունակում է Գազայի հատվածում 2023 թ. հոկտեմբերի 7-ից մեկնարկած ռազմական գործողությունները։ Գազայի առողջապահության նախարարության տեղեկություններով՝ շուրջ 52 600 պաղեստինցի է զոհվել Գազայի դեմ Իսրայելի պատերազմի հետևանքով, վիրավորվել է ավելի քան 118 610-ը:
Իսրայելը Գազայի հատվածում ռազմական գործողություններ էր սկսել՝ ի պատասխան պաղեստինյան ՀԱՄԱՍ շարժման զինյալների ներխուժման, որի հետևանքով զոհվել էր գրեթե 1200 մարդ, գերեվարվել՝ շուրջ 250 մարդ։
