ՆԳՆ-ի 22 միլիոնանոց հրատապ գնումը նորաստեղծ ընկերությունից
Ներքին գործերի նախարարությունն օրերս ոչ մրցակցային հրատապ հերթական գնումն է կատարել դեռ մեկ տարին չբոլորած մի ընկերությունից։
Էլեկտրական մեքենաների լիցքավորման ծառայությունների համար ՆԳՆ-ն «Չարջերսիսթեմ» ՍՊԸ- ի հետ ապրիլի 17-ին կնքել է 22 միլիոն դրամ ընդհանուր արժեքով պայմանագիր։
Պայմանագրի տեխնիկական բնութագրից տեղեկանում ենք, որ այս ընկերությունը սպասարկելու է ՆԳՆ ոստիկանության Երևան քաղաքի Պարեկային ծառայության 67 միավոր VOLVO EX40 մակնիշի տրանսպորտային միջոցները, լիցքավորման ծառայության արժեքը 1 կՎտ/ժ-ի համար հաշվարկվել է 95 դրամ՝ ներառյալ ԱԱՀ-ն։
«Չարջերսիսթեմ» ընկերությունը հիմնադրվել է նախորդ տարի սեպտեմբերին։ Ընկերության 100 տոկոս սեփականատերն Անահիտ Վարդանյանն է, որի տան հասցեում էլ հենց գրանցված է ընկերությունը։ Այս ընկերությունը, ըստ էլեկտրոնային գնումների armeps համակարգի, մինչ այս հրատապ գնման պայմանագիրը, որևէ այլ գնում չի կատարել պետական գերատեսչությունների հետ։
