Իսրայելական բանակը հետ է քաշվել հարավային Լիբանանից՝ բացառությամբ հինգ «ռազմավարական կետերի»
Լիբանանյան բանակի ստորաբաժանումները մուտք են գործել երկրի հարավային շրջաններ, որտեղից հրադադարի համաձայնագրի համաձայն՝ դուրս են եկել իսրայելական ուժերը։
Ակս մասին հայտնում է Al Jazeera-ն։ Լիբանանյան բանակը մտել է հարավային Լիբանանի կենտրոնական և արևելյան հատվածներ՝ Մհայբիբ, Մեյս ալ-Ջաբալ, Բլիդա, Հուլա և Մարքաբա։Իր հերթին Իսրայելի հեռուստառադիոհեռարձակող ընկերությունը հաստատել է, որ իսրայելական բանակը հետ է քաշվել հարավային Լիբանանից, բացառությամբ 5 հատվածների։
Տեղեկություններ կան, որ իսրայելական ուժերը տեղակայվել են Ջաբալ Բլատում՝ հարավային Լիբանանի արևմտյան հատվածում: Ավելի վաղ իսրայելական բանակը հայտարարել էր, որ իր ուժերը դուրս են գալու լիբանանյան տարածքից, բացառությամբ 5 ռազմավարական կետերի, որտեղ նրանք կմնան անորոշ ժամանակով։
Հայտարարության մեջ նշվում է, որ Իսրայելի պաշտպանության բանակի մարտիկները երկուսուկես ամիս աշխատել են հարավային Լիբանանում ցամաքային գործողության ընթացքում առավելագույն ձեռքբերումների հասնելու համար: Խուզարկվել են «շփման գծում գտնվող տարածքներում «Հեզբոլլահ»-ին պատկանող տների և ենթակառուցվածքների մեծ մասը»: Նաև նշվել է, որ Իսրայելի հետ սահմանի մոտ գտնվող լիբանանյան բոլոր շրջաններն այժմ հիմնականում զերծ են զենքից, իսկ «Հեզբոլլահ»-ի ռազմական ենթակառուցվածքները ոչնչացված են։
Լիբանանյան «Հեզբոլլահ»-ի և իսրայելական բանակի միջև հրադադարի մասին համաձայնագիրը ուժի մեջ է մտել 2024 թվականի նոյեմբերի 27-ից երկու կողմերի միջև ամիսներ շարունակվող ռազմական գործողություններից հետո, որոնք սկսվել էին Իսրայելի և ՀԱՄԱՍ-ի միջև Գազայի հատվածում ընթացող պատերազմին զուգահեռ։
