Տոմատի և գինու սոուսի մեջ շոգեխաշած տավարի միս
Բաղադրիչները՝ 4 բաժնի համար
- 600-700 գ տավարի միս
- 1-2 գլուխ սոխ
- 2 ճ/գ բուսական յուղ
- 300 մլ ջուր կամ մսային արգանակ
- 300 մլ կարմիր չոր գինի
- 2 ճ/գ տոմատի մածուկ
- 1/2 թ/գ աղ
- աղացած սև պղպեղ՝ ըստ ճաշակի
- 1-2 ճյուղ նեխուր՝ ցանկության դեպքում
Պատրաստման եղանակը
Միսը միջին չափի կտորներով կտրատեք: Սոխը օղակաձև կտրատեք ու օղակները քառատեք:
Թավայի մեջ միջին ուժգնության կրակի վրա տաքացրեք յուղը: Սոխն ու կտրտած նեխուրը տապակեք յուղի մեջ մինչև փափկելը: Լցրեք ափսեի մեջ:
Նույն թավայի մեջ բոլոր կողմերից տապակեք միսը մինչև գույնը փոխելը:
Սոխն ու նեխուրը վերադարձրեք թավայի մեջ: Վրան լցրեք տաք արգանակը կամ ջուրը գինու հետ միասին: Ավելացրեք տոմատի մածուկը, աղն ու պղպեղը:
Եռալուց հետո կրակը թուլացրեք: Կափարիչով փակեք ու մոտ 1,5 ժամ շոգեխաշեք մինչև մսի փափկելը: Լցրեք ափսեի մեջ ու մատուցեք:
